ރަޝިއާގެ ރައީސް ވްލޭޑްމިއާ ޕޫޓިންގެ އަމުރުފުޅަކަށް ފަށާފައި ވާ ހަނގުރާމައިގެ ސަބަބުން ރެފިއުޖީންގެ ގޮތުގައި ޔޫކްރޭނުން ނިކުތް މީހުންގެ އަދަދު 2 މިލިއަނަށް އަރާފައި ވާ ކަމަށް، ރެފިއުޖީންނާ ބެހޭ އދގެ ހައިކޮމިޝަނަރު ފްލީޕޯ ގްރާންޑީ ވިދާޅުވެއްޖެއެވެ.
ފަރަންސޭސި ރޭޑިއޯ ސްޓޭޝަނެއް ކަމަށް ވާ ފްރާންސް އިންޓާއަށް ދެއްވި ބަސްދީގަތުމަކާ ހަވާލާދީ، ސީއެންއެންއިން ރިޕޯޓް ކުރާ ގޮތުގައި، މި އަދަދަކީ ބިރު ގަންނަ ވަރުގެ އަދަދެއް ކަމަށް ގްރާންޑީ ވަނީ ވިދާޅުވެފައެވެ.
އެތައް ސަތޭކަ ހާސް ބަޔަކު މިހާރުވެސް ދަތުރު ކުރަމުން ދާ ކަމަށާ، ހަނގުރާމައިގެ ކުރިމަތިލުންތަކުން ސަލާމަތް ވުމަށް އެންމެ ފުރަތަމަ ހިމާޔަތް ހޯދަން މަސައްކަތް ކުރަނީ ގައުމު ތެރެއިން ކަމަށާ، ނަމަވެސް ގައުމު ތެރެއިން ރައްކާތެރިކަން ލިބޭ ސަރަހައްދުތަކުގެ ދަތިކަން ކުރިމަތިވެ، ދެވަނަ ގޮތެއް ނެތިގެން ބޯޑަރު ހުރަސް ކުރާ ކަމަށް ގްރާންޑީ ވަނީ ވިދާޅުވެފައެވެ.
ރެފިއުޖީންގެ ގޮތުގައި ހުޖުރަ ކުރި މީހުންގެ ތެރޭގައި މުޅިންހެންވެސް ހިމެނެނީ އަންހެނުންނާއި ކުޑަކުދިންނާއި ދޮށީ އުމުރުގެ މީހުންކަންވެސް ގްރާންޑީ ވަނީ ފާހަގަ ކުރައްވާފައެވެ. އަދި ގިނަ ރެފިއުޖީން ހިޖުރަ ކޮށްފައި ވަނީ ޕޯލަންޑާއި މޮލްޑޯވާއަށް ކަމަށްވެސް އޭނާ ވަނީ ފާހަގަ ކުރައްވާފައެވެ.
