ވެރިރަށް ކިއޭވްގެ ސަރަހައްދުގައި ހަނގުރާމައިގެ ޖަރީމާ ހިންގާ ސިފައިންގެ ކޮންމެ މީހަކު، ޔޫކްރައިންގެ އަސްކަރިއްޔާއިން ހޯދާ، އެމީހަކަށް ދެން އޮތް ތަނަކީ "ކަށްވަޅު" ކަމުގައި ހަދާނެ ކަމުގެ އިންޒާރު، ޔޫކްރައިންގެ ރައީސް ވްލޮޑޮމީރް ޒެލެންސްކީ، ރަޝިއާގެ ފައުޖުތަކަށް ދެއްވައިފިއެވެ.
ކޮންމެ ރެއަކުވެސް ގައުމުގެ ރައްޔިތުންނާ މުހާތަބު ކުރައްވާ ދެއްވާ ތަގުރީރުގައި، ރަޝިއާގެ ފައުޖުތަކަށް މެސެޖެއް ދެއްވަމުން ޒެލެންސްކީ ވަނީ، އޭނާގެ ގައުމަށް އަރާ، ގަސްތުގައި މީހުން މަރަމުން ދާއިރު، އިންސާފުގެ ދުވަހަކާ އަސްކަރިއްޔާއަށް ކުރިމަތިލާން ޖެހޭނެ ކަމުގެ އިންޒާރު ދެއްވާފައެވެ.
"މި ގޮތަށް ކިތަށް އާއިލާ ޔޫކްރޭނުން މަރުވެއްޖެ؟ އަހަރަމެން މައާފެއް ނުދޭނަން. ހަނދާން ނައްތައެއް ނުލާނަން. މި ހަނގުރާމާގައި ޖަރީމާ ހިންގި ކޮންމެ މީހަކަށްވެސް އަހަރަމެން އަދަބު ދޭނަން. އަހަރަމެންގެ ބިމުގައި" ޒެލެންސްކީ ވިދާޅުވިއެވެ.
ރަޝިއާގެ ހަނގުރާމަވެރިންނާ މުހާތަބު ކުރައްވާ ތަގުރީރު ކުރިއަށް ގެންދަވަމުން ޒެލެންސްކީ ވަނީ، ކަށްވަޅު މި ފިޔަވާ މި ބިމުގައި އެ ހަނގުރާމަވެރިންނަށް ހިމޭން ތަނެއް ނޯންނާނެ ކަމަށް ވިދާޅުވެފައެވެ.
ހަނގުރާމާގައި މިހާތަނަށް ކުރެވުނު ކަންކަމުން ރަޝިއާގެ ހަނގުރާމަވެރިންނަށް ފުދުނުހެން ހީފުޅު ނުވާ ކަމަށާ، އެބައި މީހުން އަދިވެސް ބޭނުންވަނީ އިތުރު ބަޔަކު މަރަން ކަމަށް ޒެލެންސްކީ ވަނީ ތުހުމަތު ކުރައްވާފައެވެ.
މި މޭރުމުން ޒެލެންސްކީ ވަނީ، ރަޝިއާއާ ދެކޮޅަށް ސާބިތު ފިޔަވަޅުތަކެއް އެޅުއްވުމަށް ހުޅަނގުގެ ލީޑަރުންނަށް ގޮވާލައްވާފައެވެ. އަދި ޔޫކްރައިންއަށް ވެރިވެގެންފައިވާ އަދުއްވުގެ ކިބައިން ފެންނަ ލަދުކުޑަ ކަމީ، އެބައި މީހުންނާ ދެކޮޅަށް މިހާރު ތަންފީޒު ކުރަމުންދާ ދަތި ކުރުމުގެ ފިޔަވަޅުތަކަކުން ނުފެދޭ ކަމުގެ ސިގުނަލެއް ކަމަށްވެސް ޒެލެންސްކީ ވަނީ ވިދާޅުވެފައެވެ.
ރަޝިއާގެ ރައީސް ވްލޭޑްމިއާ ޕޫޓިންގެ އަމުރުފުޅަކަށް ފެބުރުއަރީ 24 ވަނަ ދުވަހު އެ ގައުމުގެ އަސްކަރިއްޔާއިން ޔޫކްރައިންއަށް އަރާ ހަނގުރާމަ ކުރަން ފެށުމާއެކު، ހުޅަނގުގެ ބޮޑެތި ބާރުތަކުންނާއި ބައިނަލްއަގުވާމީ އެކި ފަރާތްތަކުން ދަނީ ރަޝިއާއާ ދެކޮޅަށް ދަތިކުރުމުގެ ހަރުކަށި ފިޔަވަޅުތަކެއް އަޅަމުންނެވެ. ނަމަވެސް މިއިން ފިޔަވަޅެއްގެ ސަބަބުން، ހަނގުރާމައިގެ މައިދާނުގައި ރަޝިއާއިން އެންމެ ފިޔަވަޅެއްވެސް ފަހަތަށް އަޅާތީއެއް ނުފެނެއެވެ.
