ކޮރޯނާވައިރަސް ޑިޒީޒް (ކޮވިޑް-19) ޖެހިގެން މަރުވާ މީހުން ވަޅުލުމުގެ ކަންކަން ކުރިއަށް ގެންދިއުމަށް މީގެ ކުރިން ކަނޑައަޅާފައި ވާ ހަރުކަށި އުސޫލަށް، ސްރީލަންކާގެ ސަރުކާރުން ލުއި ދީފިއެވެ.
އެގޮތުން ސްރީލަންކާގެ ކޮންމެ ގަބުރުސްތާނެއްގައިވެސް ކޮވިޑްގައި މަރުވާ މީހުންގެ ހަށިތައް ވަޅުލުމުގެ އިޒުނަ، އެ ގައުމުގެ ޑައިރެކްޓާ ޖެނެރަލް އޮފް ހެލްތު ސާވިސަސް ޑރ އަސޭލާ ގުނަވަރްދަނާ ވަނީ ދެއްވާފައެވެ.
ސްރީލަންކާގެ މެޑިކަލް ޓެކްނިކަލް ސާވިސަސްގެ ޑައިރެކްޓާ ޑރ އަންވަރު ހަމްދާނީ ވިދާޅުވީ، ކޮންމެ ގަބުރެސްތާނެއްގައިވެސް ވަޅުލުމުގެ ފުރުސަތު ދިނީ، ފޮރެންސިކް ތަޖުރިބާކާރުންގެ ކޮމިޓީއަކުން ބަލަން ޖެހޭ ކަންތައްތައް ބެލުމަށްފަހު، ހުށަހެޅި އިރުޝާދުތަކަކަށް ރިއާޔަތް ކުރުމަށް ފަހުގައި ކަމަށެވެ.
ކޮވިޑް ޖެހިގެން ލަންކާގައި މަރުވާ މީހުން ވަޅުލުމުގެ ކަންކަން ކުރިއަށް ގެންދިއުމަށް އެ ގައުމުން އެންމެ ފުރަތަމަ ހުރަސް އެޅިއެވެ. އެކަމާ ގުޅިގެން ދީނީ ގޮތުން ހިޔާލު ތަފާތު ވުންތަކެއް އުފެދި، ހޫނު މުޒާހަރާތަކެއްވެސް ކުރިއެވެ. އޭގެ ފަހުން ކޮންމެވެސް ވަރެއްގެ ލުއިތަކެއް ދިނެވެ. ޖެހިގެން މަރުވާ މުސްލިމުންގެ ގަބަރުވެސް އަންދައިގެން ނައްތާލުމަށް އޮތް އަމުރަށް ލަންކާއިން ބަދަލު ގެނެސް، ވަޅުލަން ހުއްދަ ދޭން ނިންމީ ފެބުރުއަރީ 2021 ގައެވެ.
ސްރީލަންކާގައި ކޮވިޑް ޖެހިގެން މަރުވާ މީހުންގެ ގަބުރު ނައްތާލަމުން އައި އަންދައިގެން ކަމަށް ވާއިރު، އެއީ ސްރީލަންކާގެ އާބާދީގައި ބައިމަދު މުސްލިމުންނާއި ބައެއް ޣައިރު މުސްލިމުންގެ ދީނާ ފުށު އަރާ ކަމެކެވެ. ކޮވިޑް ޖެހިގެން މަރުވާ މީހުންގެ ގަބުރު އަންދައިގެން ނައްތާލަމުން ދާ ދިއުން ހުއްޓުވުމަށް ބައިނަލްއަގުވާމީ ފެންވަރުގައިވެސް ވަނީ އަޑު އުފުލާފައެވެ. އަދި މިކަމަށް ހައްލެއް ހޯދުމަށް ލަންކާ ސަރުކާރުން ދިވެހި ރާއްޖޭގެ އެހީތެރިކަމަށްވެސް އެދުނެވެ.
