ކުޑަރިކިލުގައި ރޯގާ ފެތުރޭއިރު ޑޮކްޓަރެއްނެތް، މުޒާހަރާކޮށް ސިއްހީ މަރުކަޒު ބަންދުކޮށްފި

ބ. ކުޑަރިކިލުގައި ބޭރަށް ހިންގުމާއި ހޮޑުލުމުގެ ރޯގާ ފެތުރެން ފަށާފައި ވާއިރު، އެ ރަށުގައި ޑޮކްޓަރަކު ނެތި ރައްޔިތުން ނިކުމެ މުޒާހަރާކޮށް ސިއްހީ މަރުކަޒު ބަންދުކޮށްފިއެވެ.

މި ދުވަސްވަރު ރާއްޖެއިން ކޮވިޑް ކޭސްތައް އިތުރުވަމުން އަންނައިރު، ބޭރަށް ހިންގުމާއި ހޮޑުލުގެ ރޯގާ އަންނަނީ ފެތުރެމުންނެވެ. އެގޮތުން މި މަހުގެ 11 ވަނަ ދުވަހާ ހިސާބަށް ރޯގާގެ 3491 ކޭސް ވަނީ ރިޕޯޓް ކޮށްފައެވެ.

"ދަ ޕްރެސް" އާ ވާހަކަދައްކަމުން ކުޑަރިކިލު ކައުންސިލްގެ ރައީސް އަބްދުލް ހަންނާން އައްބާސް ވިދާޅުވީ ހޮޑުލުމާއި ބޭރަށް ހިންގުމުގެ ރޯގާ ޖެހިގެން މިހާރުވެސް ވިއްސަށް ވުރެ ގިނަ މީހުންނަށް ފަރުވާދެމުން އަންނަ ކަމަށާއި މިފަދަ ދަނޑިވަޅެއްގައި ޑޮކްޓާރަކު ނެތި އެކަމާ ރައްޔިތުން ނުރުހުން ފާޅުކުރަމުން އަންނަ ކަމަށާއި އެގޮތުން މިއަދު ސިއްހީ މަރުކަޒު ސަރަހައްދުގައި ނުރުހުން ފާޅުކޮށް އެ މަރުކަޒު ބަންދުކޮށްފައިވާ ކަމަށެވެ.

ހަންނާނު ވިދާޅުވީ އަބަދުވެސް ސިއްހީ މަރުކަޒުގައި ހުންނަ ޑޮކްޓަރަކު ޗުއްޓީއަށް ދާ އިރު ލަސްވެގެން ދެ ދުވަސް ތެރޭގައި ޑޮކްޓަރެއް ފޮނުވާ ކަމަށާއި އެހެންނަމަވެސް މިފަހަރު ޑޮކްޓަރު ޗުއްޓީއަށް ދިޔަ ފަހުން 10 ދުވަސް ވެފައިވާ ކަމަށެވެ. އަދި އެނގިފައިވާ ގޮތުން ޑޮކްޓަރު ޗުއްޓީއަށް ގޮސްފައިވަނީ ޗުއްޓީއަށް ދިއުމަށް އެދޭތާ 3 މަސް ފަހުން ކަމަށް ހަންނާން ވަނީ ވިދާޅުވެފައެވެ.

ހަންނާނު ވިދާޅުވީ ޑޮކްޓަރެއް ނެތުމުން އެ ރަށުގެ މީހުން ސިއްހީ މަރުކަޒަށް ގޮސްގެން އޮންލައިންކޮށް ޑޮކްޓަރަށް ދައްކަމުން ގެންދާ ކަމަށާއި އެހެންނަމަވެސް އެ ހިދުމަތް ހޯދުމަށް 2 ނުވަތަ 3 ގަޑިއިރު ބަލި މީހާ ސިއްހީ މަރުކަޒުގައި ހޭދަކުރަން ޖެހޭ ކަމަށެވެ.

ހަންނާން އިތުރަށް ވިދާޅުވީ ކުޑަރިކިލަށް ދާ ޑޮކްޓަރަކު މިއަދު މާލެ އަންނަ ކަމުގެ މައުލޫމާތު ލިބިވަޑައިގެންފައި ވާ ކަމަށެވެ.

މުޒާހަރާގެ ބައިވެރިން ވަނީ ޑޮކްޓަރު އެ ރަށަށް ދިއުމުން ނޫން ގޮތަކަށް ގެއަށް ނުދާނެ ކަމަށާއި ބ އަތޮޅު ހޮސްޕިޓަލް މެނޭޓަރުގެ އިސްތިއުފާއަށްވެސް ގޮވާފައެވެ.