ދިވެހި ނޫސްވެރިން ތަމްރީނު ކުރަން އިންޑީއާއަށް ފޮނުވަން އިންޑިއަން ހައި ކޮމިޝަނާއެކު މޯލްޑިވްސް މީޑިއާ ކައުންސިލާ (އެމްއެމްސީ) އިން މަޝްވަރާ ކޮށްފިއެވެ.
އެމްއެމްސީން ބުނީ މި މަޝްވަރާ ބައްދަލުވުމުގައި އިންޑިއާ އަށް ދިވެހި ނޫސްވެރިން ފޮނުވައިގެން ތަމްރީނު ޕްރޮގްރާމް ތަކެއް ހިންގުމަށާއި، އިންޑިއާގެ ތައުލީމީ ހިދުމަތްދޭ މަރުކަޒުތަކުގެ މާހިރުން ދިވެހިރާއްޖެ ގެނެސްގެން ތަމްރީނު ޕްރޮގްރާމް ތަކެއް ފެއްޓުމަށާއި، އަދި މި ދާއިރާގެ ތަމްރީނު ޕްރޮގްރާމް ތަކެއް އޮންލައިންކޮށް ހިންގުމަށް މަޝްވަރާ ކޮށްފައިވާ ކަމަށެވެ.
މީގެ އިތުރުން، ކުރު މުއްދަތާއި ދިގު މުއްދަތުގެ ސްކޮލާޝިޕް ޕްރޮގްރާމް ތަކެއް ނޫސްވެރިންނަށް ހޯދައިދިނުމާ ގުޅޭގޮތުން މަޝްވަރާ ކޮށްފައިވާ ކަމަށް ވެސް އެމްއެމްސީން ބުނެއެވެ.
އެމްއެމްސީން ބުނީ ދިވެހިރާއްޖޭގައި ހުންނަވާ އިންޑިއަން ހައި ކޮމިޝަނަރު ހިޒް އެކްސެލެންސީ މުނޫ މަހާވަރު ވަނީ ދިވެހި ނޫސްވެރިންނަށް ތަމްރީނު ފުރުސަތުތައް ފަހިކޮށްދެއްވުމަށް މަސައްކަތް ކޮށްދެއްވާނެ ކަމުގެ ޔަގީންކަން މޯލްޑިވްސް މީޑިއާ ކައުންސިލަށް ދެއްވާފައި ކަމަށެވެ.
އަދި ދިވެހިރާއްޖޭގެ މީޑިއާ ކައުންސިލާއި އިންޑިއާގެ ޕްރެސް ކައުންސިލްއާއި ގުޅުން ބަދަހިކޮށްދެއްވާ، މިދާއިރާއަށް ބޭނުންވާ ތަމްރީނު ޕްރޮގްރާމްތައް ލިބޭނެ މަގު ފަހިކޮށްދިނުމަށް މަސައްކަތް ކޮށްދެއްވާނެ ކަމަށް ވެސް އިންޑިއަން ހައި ކޮމިޝަނަރު ވިދާޅުވި ކަމަށް އެމްއެމްސީން ބުނެއެވެ.
މި މަޝްވަރާތަކުގައި އެމްއެމްސީގެ ފަރާތުން ކައުންސިލްގެ ރައީސް ސަހުބާން ފަހުމީ، ކައުންސިލްގެ މެންބަރު އަލީ ހުސެއިން، މެންބަރު އިބްރާހިމް ފައުޒީ، މެންބަރު މުހައްމަދު ޝަފާއު ހަސަން އަދި ސެކްރެޓަރީ ޖެނެރަލް ޑރ. އިބްރާހިމް ސަމީރު ބައިވެރިވެ ވަޑައިގަންނަވާފައިވާ ކަމަށް އެމްއެމްސީން ބުނެއެވެ، އަދި އިންޑިއަން ހައި ކޮމިޝަނުގެ ފަރާތުން ހައިކޮމިޝަނަރު މުނޫ މަހާވަރާއި ޑެޕިއުޓީ ހައި ކޮމިޝަނަރު ރޯހިތު ރިތިޝްގެ އިތުރުން ހައިކޮމިޝަންގެ އިސްވެރިން ބައިވެރިވެ ވަޑައިގަތް ކަމަށް އެމްއެމްސީން ބުނެއެވެ.
