ބެޑްމިންޓަން ވޯލްޑް ޗެމްޕިއަންޝިޕްގައި ވާދަކުރުމަށްޓަކައި ރާއްޖޭގެ ގައުމީ ޑަބަލްސް ޗެމްޕިއަންސް، ފާތިމަތު ނަބާހާ އަބްދުއް ރައްޒާގާއި އާމިނަތު ނަބީހާ އަބްދުއްރައްޒާގް ސްޕެއިނަށް ދިއުމަށްޓަކައި ޝެންގެންގެ ވިސާ ހަމަނުޖެހުނު ސަބަބު ފޮރިން މިނިސްޓްރީން ހާމަކޮށްދީފިއެވެ.
ނަބާ އާއި ނަބީ އަށް ސްޕެއިނަށް ނުދެވޭ ކަން އެނގުނީ ބަންގްލަދޭޝްގައި މި މަހު ބޭއްވި އިންޓަނޭޝަނަލް ޗެލެންޖް މުބާރާތުގައި ވާދަކުރުމަށް ފަހު މިދިޔަ އާދިއްތަ ދުވަހު މާލެ އައި ފަހުންނެވެ. ސްޕޭންގައި މިއަދު ފެށުމަށް ހަމަޖައްސާފައިވާ ވޯލްޑް ޗެމްޕިއަންޝިޕް ކުރިއަށް ދާނީ މި މަހުގެ 19 ވަނަ ދުވަހުގެ ނިޔަލަށެވެ. އަދި މި މުބާރާތަށް އެ ދެކުޅުން ތެރިންނަށް ނުދެވުމުން ގިނަ ބަޔަކު އަންނަނީ ފޮރިން މިނިސްޓަރު އަބްދުﷲ ޝާހިދަށް ފާޑުކިޔަމުންނެވެ.
ފޮރިން މިނިސްޓްރީން ބުނީ، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓާއި، މޯލްޑިވްސް އޮލިމްޕިކް ކޮމިޓީ އަދި ދިވެހިރާއްޖޭގެ ކުޅިވަރު އެސޯސިއޭޝަންތަކާ ގުޅިގެން، ބޭރުގެ އެކިއެކި ކުޅިވަރު މުބާރާތްތަކުގައި ވާދަކުރާ ދިވެހި އެތުލީޓުންނަށް ފުރުސަތުތައް ފަހިކޮށް ދިނުމަށާއި، މުބާރާތްތަކުގައި ބައިވެރިވާ ފަރާތްތަކުގެ ވިސާ ފަދަ އިންތިޒާމުތައް ހަމަޖެއްސުމަށް އަބަދުވެސް އެހީތެރިކަން ފޯރުކޮށްދެމުން ގެންދާ ކަމަށެވެ.
އެހެން ނަމަވެސް ބައެއް މުބާރާތްތަކުން ދިވެހި އެތުލީޓުންނަށް ފުރުސަތު ލިބޭ އިރު، މުބާރާތް އޮންނަ ތާރީހު ވަރަށް ކައިރިވެފައި އޮންނަ ކަމަށާއި އެ ގައުމުތަކަށް ދަތުރު ކުރުމަށް ބޭނުންވާ ވިސާ ހޯދުމަށް ދަތިތަކާ ކުރިމަތިވާ ކަމަށް ފޮރިން މިނިސްޓްރީން ބުނެއެވެ. އަދި މިފަދަ ހާލާތްތަކުގައި އެ ގައުމުތަކުގެ ސަރުކާރުތަކާ ގުޅިގެން ކުރެވޭ މަސައްކަތުން ވިސާ ލިބޭނެ އިންތިޒާމު ހަމަޖެހޭ ކަމަށެވެ.
ނަމަވެސް ވިސާ އެޕްލިކޭޝަން ސެންޓަރު ހުންނަ ގައުމަށް ދަތުރު ކުރުމާއި, ވިސާ ޕްރޮސެސް ކުރުމަށް އެކަށީގެންވާ ވަގުތު ނެތުމުގެ ސަބަބުން އެފަދަ މުބާރާތްތަކުގައި ބައިވެރިވުމަށް ދިވެހި އެތުލީޓުންނަށް ހުރަސްތައް ކުރިމަތިވާ ކަމަށް ފޮރިން މިނިސްޓްރީން ބުނެއެވެ. ދިވެހި އެތުލީޓުންނަށް ލިބޭ ފުރުސަތުތަކުގެ ބޭނުން ހިފުމަށް އެ އެތުލީޓުންނަށާއި ކުޅިވަރު އެސޯސިއޭޝަންތަކަށް މި މިނިސްޓްރީއިން ދޭން ޖެހޭ ފުރިހަމަ އެއްބާރުލުން މިހާރެކޭ އެއްފަދައިން ކުރިއަށް އޮތްތަނުގައި ވެސް ދޭނެކަމުގެ ފުރިހަމަ ޔަގީންކަން އަރުވާ ކަމަށް ފޮރިން މިނިސްޓްރީން ބުނެއެވެ.
ހަމައެއާއެކު ޗުއްޓީއަށާއި، ވިޔަފާރިއަށް، އަދި ތައުލީމު ހާސިލްކުރުމަށް ވެސް ރާއްޖެއިން ބޭރަށް ދަތުރު ކުރުމުގައި ވިސާ ނަގަން ޖެހޭ ނަމަ، ވިސާ ހޯދުމުގައި އެހީތެރިކަން ފޯރުކޮށް ދިނުމަކީ އެ މިނިސްޓްރީ އިން ދެމުންގެންދާ ކޮންސިއުލާ ހިދުމަތްތަކުގެ ތެރޭގައި ހިމެނިފައި އޮންނަ ކަމެއް ކަމަށް ފޮރިން މިނިސްޓްރީން ބުނެއެވެ. ނަމަވެސް މިފަދަ އެހީތެރިކަން ބޭނުންވާ ފަރާތްތަކުން ދަތުރު ކުރުމުގެ ކުރިން ވިސާގެ ކަންކަން އޮންނަ ގޮތުގެ މައުލޫމާތު ސާފުކޮށް، ދުރާލާ ވީހާވެސް އަވަހަށް ވިސާގެ ކަންތައް ހަމަޖެއްސުމަށް ސަމާލުކަން ދިނުމަކީ ވަރަށް މުހިއްމު ކަމެއް ކަމަށް އެ މިނިސްޓްރީން ބުނެއެވެ.
މީގެ އިތުރުން ވިސާއަށް އެދި ހުށަހަޅާ އިރު ލިޔެކިޔުން ފުރިހަމަ ތޯ އާއި، ހުށަހަޅަނީ ދަތުރު ކުރުމަށް ބޭނުންވާ ކެޓަގަރީގެ ވިސާއަށް ތޯ ކަށަވަރު ކުރުމަކީ ވެސް ވަރަށް މުހިއްމު ކަމެއް ކަމަށް ފޮރިން މިނިސްޓްރީން ބުނެއެވެ. މިކަންކަން ކުރުމަށް އެވްރެޖްކޮށް 2 ނުވަތަ 3 ހަފްތާ ވަރު ބޭނުން ވާތީ، އެފަދަ އެހީތެރިކަމަށް ބޭނުންވާ ފަރާތްތަކުން އެހާ މުއްދަތު އޮއްވާ ވިސާ ހޯދަން ހުށަހެޅުމަށް އެ މިނިސްޓްރީން އިލްތިމާސް ކުރެއެވެ. އަދި މި ދުވަސްވަރަކީ ކޮވިޑް-19ގެ ސަބަބުން، އާންމުކޮށް ވިސާ ނެގުމުގައި ހޭދަވާ މުއްދަތަށް ވުރެ ދިގު މުއްދަތެއް ހޭދަވާ ދުވަސްވަރެއް ކަމަކަސް ވުމުން، އެކަމަށް އިތުރު ހާއްސަ ސަމާލުކަމެއް ދިނުމަށް ވެސް ފޮރިން މިނިސްޓްރީން ބުނެއެވެ.
