މަސްވެރިންގެ ދުވަހާ ދިމާކޮށް މަސްވެރިން ނުކުމެ ޝުއޫރު ފާޅު ކުރުމުގެ ހަރަކާތްތައް މިއަދު ގުޅީފަޅުގައި އޮންނާނެ ކަމަށް މަސްވެރިންގެ ޔޫނިއަން އިން ބުނެފިއެވެ.

'ދަ ޕްރެސް' އަށް މައުލޫމާތު ދެއްވަމުން ބޮޑު ކަންނެލި މަސްވެރިންގެ ޔޫނިއަންގެ ސެކެޓްރީ ޖެނެރަލް މުހައްމަދު ނާޒިމް ވިދާޅުވީ، މަސްވެރިންގެ ދުވަހާ ގުޅިގެން ބޮޑު ކަންނެލީގެ މަސްވެރިކަން ކުރާ ދޯނިތައް އެއްތަނަކަށް އެއްވެ މަސްވެރިންގެ ޝަކުވާތައް ހިއްސާ ކުރުމަށް ގުޅީފަޅުގައި މިއަދު މެންދުރު ފަހު 02:00 އިން 04:00 އަށް ޝުއޫރުފާޅުކުރުން ކުރިއަށް ގެންދާނެ ކަމަށެވެ.

މިހަރަކާތުގައި ބައިވެރިވުމަށް 70 ވަރަކަށް ދޯނި އަންނާނެ ކަމަށް ލަފާކުރެވޭ ކަމަށް ނާޒިމް ވިދާޅުވިއެވެ.

މި ހަރަކާތުގައި މަސްވެރިންގެ ޝުއޫރުތައް ފާޅުކުރުމަށް ނިންމާފައި ވާއިރު އެހެން އަހަރުތަކޭ އެއްގޮތަށް މާލެ ވަށާ ބުރެއް ޖެހުމަށް ވެސް ހަމަޖެހިފައިވާ ކަމަށް ނާޒިމް ވިދާޅުވިއެވެ.

https://thepress.mv/132109

ބޮޑުކަންނެލި މަސްވެރިންގެ ޔޫނިއަނުން ކަންނެލި މަސްވެރިންގެ ހައްގުގައި އަންނަނީ އެތައް މަސައްކަތެއް ކުރަމުންނެވެ. މިގޮތުން ސަރުކާރުގެ އިސްވެރިންނާއި، ރައްޔިތުންގެ މަޖިލީހާއި، މަސްވެރިކަމުގެ ސިނާއަތުގައި ހަރަކާތްތެރިވާ ކުންފުނިތަކާ ބައްދަލުކޮށް ބޮޑު ކަންނެލި މަސްވެރިންގެ ހުރި ކަންބޮޑުވުންތައް ވަނީ ހިއްސާކޮށްފައެވެ. އަދި ބޮޑު ކަންނެލި މަސްވެރިންގެ ހައްގުގައި އެ ޔޫނިއަނުން ގެންދަނީ ސޯޝަލް މީޑިއާ މެދުވެރިކޮށް ވަރަށް ފާޅުކަން ބޮޑުގޮތެއްގައި އަޑު އުފުލަމުންނެވެ.

މިދިޔަ އަހަރު ވެސް މަސްވެރިންގެ ދުވަހު އެ ޔޫނިއަނުން ވަނީ ދޯނިފަހަރުގައި އެއް ސަރަހައްދަކަށް އެއްވެ މަސްވެރިންގެ ޝުއޫރުތައް ފާޅުކޮށްފައެވެ. ރާއްޖޭގައި ޓޫރިޒަމް ޕްރޮމޯޓް ކުރާ އުސޫލުން މަސްވެރިކަން ވެސް ޕްރޮމޯތް ކޮށް ކުރިއަރުވަން ޖެހޭ ކަމަށް އެ ޔޫނިއަނުން ވަނީ މީގެ ކުރިން ވެސް ބުނެފައެވެ.

ހަބަރު މަސްވެރިކަން ސިޔާސީ