މާލޭގެ ގެއެއްގައި މަރުވެފައި އޮތް އުމުރުން 83 އަހަރުގެ ފިރިހެނަކު ފެނިއްޖެއެވެ.
ފުލުހުން ބުނީ، އެމީހާ ފެނިފައި ވަނީ ހެންވޭރުގެ ގެއެއްގައި މަރުވެފައި އޮއްވާ ކަމަށާއި މި ކަން ފުލުހުންނަށް ރިޕޯޓް ކޮށްފައި ވަނީ މިއަދު މެންދުރުފަހު 2:30 ހާއިރު ކަމަށެވެ. މަރުވެފައި އޮތް މީހާގެ ހަށިގަނޑު މިހާރު ވަނީ އައިޖީއެމްއެޗަށް ގެންގޮސްފައެވެ.
ފުލުހުން ބުނީ މި ކަމާ ގުޅޭ ގޮތުން ބަލަން ޖެހޭ ކަންކަން ބަލަމުން ދާ ކަމަށެވެ.
އުމުރުން ދުވަސް ވީ މީހަކު މަރުވެފައި އޮއްވާ ފެނުނު އިރު މާލޭގައި ހުރި ފަޅު ގެއެއްގެ ތެރެއިން ކުނި ވަސް ދުވާތީ އެތަން ބެލި އިރު މަރުވެފައި އޮތް 37 އަހަރުގެ ފިރިހެނަކު މިމަހުގެ 14 ވަނަ ދުވަހުވެސް ފެނިފައި ވެއެވެ.
ހަމައެއާއެކު މި އަހަރުތެރޭ ގަލޮޅުގައި ހުރި ގެއެއްގެ ތެރެއިން ވެސް މަރުވެފައި އޮތް 29 އަހަރުގެ އަންހެނަކު ފެނިފައި ވާ އިރު، މިއަހަރު ކުރީ ކޮޅު ވެސް ވަނީ ގެއެއްގައި މަރުވެފައި އޮތް 61 އަހަރުގެ މީހަކު ފެނިފައެވެ.
