މާލޭގެ ހެންވޭރުގައި ޑޮނާޑް ގާމެންޓް ހުންނަ އިމާރާތުގެ ތިން ވަނަ ފަންގިފިލާގައި އަލިފާން ރޯވެއްޖެއެވެ.
އެމްއެންޑީއެފުން ބުނީ، މި އަލިފާނުގެ ހާދިސާ ހިނގައިގެން ރިޕޯޓުކޮށްފައި ވަނީ މިއަދު ހަވީރު 4:49 ހާއިރު ކަމަށެވެ. އަދި މި މައުލޫމާތު ލިބުމާއެކު އެމްއެންޑީއެފް ފަޔާ ރެސްކިއު ޓީމުން އެ ސަރަހައްދަށް ގޮސް މިހާރު ދަނީ އަލިފާން ނިއްވުމަށް މަސަައްކަތް ކުރަމުންނެވެ.
އެ އިމާރާތުގެ ތިންވަނަ ފަންގިފިލާގައި އަލިފާން ރޯވެފައިވާ އިރު، އަދި މިހާތަނަށް އެއްވެސް މީހަކަށް އަނިޔާވެފައިވާ ކަމަކަށް މައުލޫމާތު ލިބިފައެއް ނުވެއެވެ. މި ވަގުތު އެ ސަރަހައްދަށް ގިނަ ބަޔަކު ދަނީ އެއްވަމުންނެވެ.
އަލިފާން ނިއްވާލުމަށް އެމްއެންޑީއެފުން މަސައްކަތް ކުރަމުން އައި އިރު، އެ އިމާރާތުގައި ދިރިއުޅޭ އެންމެން އިމާރާތުން ނެރެ އެ އިމާރާތް ވަނީ ހުސްކޮށްފައެވެ.
އެމްއެންޑީއެފުން އިތުރަށް ބުނީ، އެ އިމާރާތުގެ ރޯވި އަލިފާން ނިއްވާލެވިފައިވާ ކަމަށެވެ. އަލިފާން ނިއްވާލާފައި ވަނީ 5:09 ހާއިރު ކަމަށާއި މި ހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށް އެމްއެންޑީއެފުން ބުނެއެވެ.
