އަފްގާނިސްތާނުގެ މައި އެއާޕޯޓަށް ފަންނީ ގޮތުން ދިމާވެފައި ވާހުރިހާ މައްސަލައެއް މިހާރު ހައްލު ކުރެވިފައި ވާ ކަމަށާ، ބައިނަލްއަގުވާމީ އެއާލައިންތަކުން، ވެރިރަށް ކާބުލްއަށް ދަތުރުތައް ފެށުމަށް އެދޭ ކަމަށް، ގަދަ ބާރުން އަފްގާނިސްތާނުގެ ކޮންޓްރޯލް ނަގާފައި ވާ ހަތިޔާރު އެޅި ހަނގުރާމަވެރި ތޯލިބާން ޖަމާއަތުން އެ ގައުމުގައި އެކުލަވާލި އިންތިގާލީ ސަރުކާރުން ބުނެފިއެވެ.
އިންތިގާލީ ސަރުކާރުގައި ހިމެނޭ ހާރިޖީ ވުޒާރާގެ ތަރުޖަމާނުގެ މަގާމަށް އައްޔަން ކޮށްފައި ވާ ޢަބްދުލްޤާދިރު ބަލްކީ އާންމު ކުރި ބަޔާނެއްގައި ބުނެފައި ވަނީ، ވިޔަފާރި އުސޫލުން ކުރާ ވައިގެ ދަތުރުތައް، ކައިރި މުސްތަގުބަލެއްގައި ފެށިގެންދާނެ ކަމަށް ތޯލިބާނުން އުއްމީދު ކުރާ ކަމަށާ، މިކަމަށް ބޭނުންވާ ފުރިހަމަ އެއްބާރުލުން، އެ ސަރުކާރުން ދޭނެ ކަމަށެވެ.
އަފްގާނިސްތާނުން ބޭރުގައި އެ ގައުމުގެ ގިނަ އަދަދެއްގެ ރައްޔިތުންތަކެއް ތާށިވެ، ގައުމަށް އެނބުރި ނާދެވިފައި އެބަތިބި ކަމަށާ، ބޭރުގެ މަންޒިލްތަކުން މަތީ ތައުލީމު ހާސިލުކޮށް، ވަޒީފާއަށް ދާން ބޭނުން ވެފައި ތިބި ގިނަ އަދަދެއްގެ ބަޔަކަށްވެސް ދަތިތަކާ ކުރިމަތިލާން ޖެހިފައި ވާ ކަމަށް ބަލްކީގެ ބަޔާނުގައި ވަނީ ބުނެފައެވެ.
ތޯލިބާނުންގެ އިންތިގާލީ ސަރުކާރުން އާންމު ކުރި މި ބަޔާނަކީ، ބައިނަލްއަގުވާމީ މުޖުތަމައުގެ ރުހުން ހޯދާ، ބައިނަލްއަގުވާމީ ފެންވަރުގައި އެ ސަރުކާރު ބަލައިގަންނާނެ ކަން ކަށަވަރު ކުރުމަށް ކުރަމުން އަންނަ ސިލްސިލާ މަސައްކަތުގެ ޗޭނަށް އެންމެ ފަހުން އިތުރުކުރި ބޮޅު ކަމުގައި ބުނެވިދާނެއެވެ.
އަފްގާނިސްތާނުގައި 20 އަހަރު ދުވަހުގެ ހަނގުރާމައެއް ކުރުމަށްފަހު އެމެރިކާއާއި އެމެރިކާއަށް އެއްބާރުލުން ދޭ އަސްކަރީ ބާރުތަކުން އަފްގާނިސްތާނު ދޫކޮށް ފައިބައިގެން ދިޔަ ފަހުން، އަފްގާނިސްތާނަށް ކުރާ ވައިގެ ދަތުރުތައް ވަނީ އިންތިހާއަށް ދަށަށް ގޮސްފައެވެ. މިދުވަސްވަރު އަފްގާނިސްތާނަށް ވައިގެ މަގުން ކުރަނީ، އެހީގެ ތަކެތި ހިފައިގެން ކުރާ ދަތުރުތަކެވެ. ކޮންމެވެސް ވަރަކަށް ފަސެންޖަރުން ގޮވައިގެންވެސް ދަތުރު ކުރެއެވެ.
ޗާޓާރު ފްލައިޓް ދަތުރުތައްވެސް ކޮންމެވެސް ވަރަކަށް އޮޕަރޭޓް ކުރެއެވެ. ޕާކިސްތާން އިންޓަނޭޝަނަލް އެއާލައިންސްއާއި އީރާންގެ މަހާން އެއާ އަދި އަފްގާނިސްތާނުގެ ކާމް އެއާއިން ހާއްސަ ފްލައިޓް ދަތުރުތަކެއް އަޅާ ފައި ވާއިރު، މި ދަތުރުތަކުގެ އަގު، އާންމު އަގުތަކަށް ވުރެ އިންތިހާ ބޮޑު ކަމަށް ހަބަރު ލިބެއެވެ.
އޯގަސްޓް 15 ވަނަ ދުވަހު، ތޯލިބާނުން އަފްގާނިސްތާނުގެ ކޮންޓްރޯލް ނެގުމާ ދިމާކޮށް، އެތައް ހާސް ބަޔަކު ވަނީ އަފްގާނިސްތާނު ދޫކޮށް ދިއުމަށް މަސައްކަތް ކޮށްފައެވެ. 120000 އެއްހާ މީހުން އަފްގާނިސްތާން ދޫކޮށް ގޮސްފައި ވާ އިރު، އިވަކުއޭޝަން ނިންމާލީ އޯގަސްޓް 30 ވަނަ ދުވަހުއެވެ. އޭރު ކާބުލް އެއާޕޯޓަށް ވަނީ ބޮޑެތި ގެއްލުންތަކެއް ލިބިފައެވެ.
ކާބުލް އެއާޕޯޓް އަލުން ހުޅުވާފައި ވަނީ، ގަތަރާއި ތުރުކީވިލާތުގެ ފަންނީ ޓީމުތަކުގެ އެހީއާއެކުގައެވެ.
