ބޭންކް އޮފް މޯލްޑިވްސް އިން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއެކު ގައުމީ ފުޓްބޯޅަ ޓީމުތަކުގެ އޮފިޝަލް ސްޕޮންސާ އެގްރީމަންޓްގެ އާ ކޮށްފިއެވެ.
ބީއެމްއެލް އިން ބުނީ ގައުމީ ފުޓްބޯޅަ ދަނޑުގައި މިއަދު ބޭއްވި ހަފްލާގައި އެ އެގްރީމަންޓުގައި ސޮއި ކުރެއްވީ ބީއެމްއެލްގެ ފަރާތުން ސީއީއޯ އަދި މެނޭޖިން ޑައިރެކްޓަރު ޓިމް ސޯޔާ އަދި އެފްއޭއެމް ގެ ރައީސް ބައްސާމް އަދީލް ޖަލީލް ކަމަށެވެ.
އެ އެގްރީމަންޓުގެ ދަށުން ބީއެމްއެލް ވެގެންދާނީ ކުރިއެކޭ ވެސް އެއްފަދައިން ގައުމީ ސީނިއާ ފިރިހެން ޓީމާ، ސީނިއާ އަންހެން ޓީމު އަދި ޔޫތު ޓީމުތަކުގެ އެކްސްކްލޫސިވް ސްޕޮންސަރަށް ކަމަށް ބީއެމްއެލް އިން ވަނީ ބުނެފައެވެ.
މި އެއްބަސްވުމާ ގުޅޭގޮތުން ޓިމް ވިދާޅުވީ ރާއްޖޭގައި ފުޓްބޯޅައިގެ ފޯރިގަދަ އެ ދަނޑިވަޅުގައި އެ ޕާޓްނާޝިޕް އާ ކުރެވިގެންދާކަމީ ލިބޭ އުފަލެއް ކަމަށެވެ. އަދި ބައިނަލްއަގްވާމީ މުބާރާތްތަކުގައި ގައުމީ ޓީމުގެ ކާމިޔާބީގައި ބައިވެރިވުމުގެ އިތުރުން ރާއްޖޭގެ ޒުވާން ޖީލަށް މި ހުނަރު ފުޅާކުރަން އެހީތެރިވުމަކީ ނުހަނު ބޮޑު އިސްކަމެއް ދޭކަމެއް ކަމަށް ވެސް ޓިމް ވަނީ ވިދާޅުވެފައެވެ. ޓިމް ވިދާޅުވީ ކުރިއަށްއޮތް ސާފް ޗެންޕިއަންޝިޕް މުބާރާތުގައި ދިވެހި ގައުމީ ޓީމަށް ކާމިޔާބު ލިބުން އެދޭ ކަމަށެވެ.
2017 ވަނަ އަހަރުން ފެށިގެން ގައުމީ ފުޓްބޯޅަ ޓީމުތަކުގެ އޮފިޝަލް ސްޕޮންސަރަކީ ބީއެމްއެލްއެވެ. އަދި ކުރިއަށް އޮތް ސާފް ޗެންޕިއަންޝިޕް 2021 ގެ އޮފިޝަލް ބޭންކިން ޕާޓްނަަރަކީ ވެސް ބީއެމްއެލްްއެވެ.
