ކުރީގެ ރައީސް އަބްދުﷲ ޔާމީން މައްޗަށް އުފުލާފައިވާ މަނީލޯންޑަރިންއާ ރިޝްވަތު ގަބޫލުކުރުމުގެ ދައުވާތަކުގެ ޝަރީއަތުގައި މިއަދު ބާއްވަން އޮތް އަޑުއެހުން ކެންސަލް ކޮށްފިއެވެ.
ރައީސް ޔާމީންގެ އަޑުއެހުން ތާވަލުކޮށްފައި އޮތީ މިއަދު 9.00 އަށެވެ. ނަމަވެސް އެގަޑިއަށް މިއަދުގެ އަޑުއެހުން ފަށާފައި ނުވާ އިރު އެކަމާ ގުޅިގެން ކްރިމިނަލް ކޯޓުގެ އިސް ގާޒީ އަހްމަދު ޝަކީލު ވިދާޅުވީ، މިއަދު މައްސަލަ ތާވަލުކުރި ވަގުތަށް އަޑުއެހުން ނުފެށި ލަސްވީ ޓެކްނިކަލް މައްސަލަތަކުގެ ސަބަބުން ކަމަށެވެ.
މިއަދުގެ އަޑުއެހުން ނިންމާލުމުގެ ކުރިން ގާޒީ ޝަކީލު ވަނީ ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހަޅާފައިނުވާތީ ސަންގެ ދެ ކުންފުންޏާ ކުރިކް ރިޟާގެ ފަރާތުން ހުށަހެޅުންތައް ހުށަހެޅުމަށް ވަކިވަކިން އަޑުއެހުންތަކެއް ބޭއްވުމަށް ނިންމާފައިވާ ކަމަށް ވިދާޅުވެފައެވެ. އަދި މައްސަލައަކީ މަދަނީ މިންގަނޑުން ކުރިއަށް ގެންދެވިދާނެ ޝަރީއަތެއް ކަމަށް ގާޒީ ނިންމެވިއެވެ.
މިއަދުގެ އަޑުއެހުމަކީ އެމްއެމްޕީއާރުސީން ރިސޯޓެއްގެ ގޮތުގައި ތަރައްގީކުރުމަށް ކުށްޔަށް ދޫކުރި ރ. ފުއްގިރީގެ މައްސަލައިގައި ރައީސް ޔާމީންގެ މައްޗަށް އުފުލާފައިވާ މަނީ ލޯންޑަރިން ކުށުގެ ދައުވާއަކާއި ރިޝްވަތު ގަބޫލުކުރުމުގެ ކުށުގެ ދައުވާގެ ޝަރީއަތުގެ އަޑުއެހުމެކެވެ.
ރައީސް ޔާމީނުގެ އިތުރުން މި މައްސަލައިގައި އެމަނިކުފާނާއެކު މަނީ ލޯންޑާ ކުރުމުގައި ބައިވެރިވިކަމުގެ ތުހުމަތު ކުރެވޭ ދައުވާ ލިބޭ ކްރިކް ރިޒާއާއި، ސަން އިންވެސްޓްމަންޓުގެ އިތުރުން، ސަން ކޮންސްޓްރަކްޝަން ގެ މައްޗަށް އުފުލާފައިވާ ދައުވާތަކުގެ އަޑުއެހުން ވެސް އެގަޑީގައި ވަނީ ކުރިއަށް ގެންގޮސްފައެވެ. ނަމަވެސް އެ ފަރާތްތަކުން ޝަރީއަތުގެ ކުރިން ހުށައަޅާ ހުށައެޅުންތަކުގެ ބައި އަދި ކުރިއަށް ގެންގޮސްފައެއް ނުވެއެވެ.
ގާޒީ ވަނީ ހުށައެޅުންތަކާއި ގުޅިގެން ގޮތެއް ނިންމެވުމާއި، ހުށަނާޅައި ހުރި ހުށައެޅުންތަކަށް އިތުރު އަޑުއެހުމެއް ތާވަލުކޮށްފައެވެ. އެގޮތުން 16 ސެޕްޓެމްބަރު ވާ ބުރާސްފަތި ދުވަހުގެ ހެނދުނު 09:00 ގައި ކްރިކް ރިޒާއަށް ހުށައެޅުން ހުށައެޅުމަށް ފުރުސަތު ދިނުމަށް ނިންމާފައިވާއިރު، އެ ދުވަހު 10:00 ގައި ސަން އިންވެސްޓްމަންޓު އަދި އެ ދުވަހުގެ 11:00 ގައި ސަން ކޮންސްޓްރަކްޝަންއިން ހުށައެޅުންތައް ހުށައެޅުމަށް އަޑުއެހުމެއް އޮންނާނެކަން ގާޒީ ޝަކީލް ފާހަގަ ކުރެއްވިއެވެ.
ޔާމީނުގެ މަށްޗަށް ހުކުމް ކޮށްފައި ވަނީ މަނީ ލޯންޑާ ކުރި ކަމުގެ ކުށް ސާބިތު ވުމުންނެވެ. މި ކުށް ސާބިތުވެ ޔާމީނުގެ މަށްޗަށް ކްރިމިނަލް ކޯޓުން ވަނީ، ނޮވެމްބަރު 29، 2021 ވަނަ ދުވަހު 5 އަހަރު ދުވަހަށް ޖަލަށް ލުމާއެކު 5 މިލިއަން ޑޮލަރުން ޖޫރިމަނާ ކޮށްފައެވެ.
ޔާމީނުގެ މައްޗަށް މި މައްސަލައިގެ އިތުރުން އިތުރު ދައުވާތަކެއް ވެސް ދަނީ ކުރަމުންނެވެ. އެގޮތުން ޓޫރިސްޓް ރިސޯޓެއް ތަރައްގީ ކުރުމަށް ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެން ޔާމީންގެ މައްޗަށް މަނީ ލޯންޑިރިންއާއި ރިޝްވަތު ގަބޫލުކުރުމުގެ ދައުވާ ވަނީ ކޮށްފައެވެ. މި ދައުވާތަކަށް ރައީސް ޔާމީން ގެންދަވަނީ އިންކާރު ކުރައްވަމުންނެވެ.
