ވެލާނާ އިންޓަނޭޝަނަލް އެއާޕޯޓުން މި ދުވަސްކޮޅު ފެންނަމުން ދަނީ މީގެ ކުރިން ފެނިފައިނުވާ މަންޒަރެކެވެ.
އެގޮތުން އެރައިވަލް އާއި ޑިޕާޗާ ޓާމިނަލްތަކުގައި މީހުން ވަނީ ތޮއްޖެހި ފުރިފައެވެ. އަދި ޓާމިނަލް ވަނީ ފުރި ބާރުވެފައެވެ. އަދި ހާއްސަކޮށް ޓާމިނަލް ތެރެއިން ފެންނަނީ އެތަނުގައި ދަތުރުވެރިން ނިދާ، ކައި ބޮއެ، ހަދާ މަންޒަރެވެ.
ގިނައީ އިންޑިއާއިން އަންނަ މީހުންނެވެ. ޔޫއޭއީ އާއި ސައުދީގައި މަސައްކަތް ކުރާ އިންޑިއާގެ ގިނަ އަދަދެއްގެ މީހުން މި ދުވަސްވަރު ރާއްޖޭގައި މަޑުކުރަނީ ރާއްޖެއިން ދާ މީހުން އެ ގައުމުތަކުގައި ކަރަންޓީނު ވާން ނުޖެހޭތީއެވެ. ނަމަވެސް އެތައް ބަޔަކު އެއްފަހަރާ އައުމާ ގުޅިގެން، އެއާޕޯޓު ތެރޭގައި އިށީންނާނެ ގޮނޑިގަނޑެއްހާ ހިސަބުވެސް ހުސްކޮށް ނެތެވެ. އިށީންނާނެ ތަންކޮޅެއް ނެތުމުން ބައެއް މީހުން އެތަނުގައި ކުނާ އަޅައިގެން ނިދާ މަންޒަރުވެސް ފެނެއެވެ.
އެކަމާ ގުޅިގެން "ދަ ޕްރެސް" އަށް މައުލޫމާތު ދެއްވަމުން އެމްއޭސީއެލްގެ ޖެނެރަލް މެނޭޖާ ކޯޕަރޭޓް ކޮމިއުނިކޭޝަން ހަސަން އަރީފް ވިދާޅުވީ އެއާޕޯޓު ފުނިޖެހެމުން ދަނީ އެމީހުންނާ ހަވާލުވެފައި ތިބި މީހުން ނޫނީ ބަލާ ދާ މީހުން ޒިންމާ އަދާނުކުރާތީ ކަމަށެވެ.
އެގޮތުން ބައެއް ފަހަރު ބަލާ ދާ މީހުން، ހެނދުނު ފްލައިޓާއި މެންދުރު ފްލައިޓުން އަންނަ މީހުން އެއްކޮށްލައިގެން ގެންދަން މަޑުކުރާކަން ފާހަގަ ކުރެއްވޭ ކަމަށާއި އޭގެ ސަބަބުން އެއާޕޯޓު ތެރޭގައި ބައިގިނަ ވެ ތޮއްޖެހޭ ކަމަށެވެ.
އަރީފް ވިދާޅުވީ ވަރަށް ބައިވަރު މީހުން އެއާޕޯޓުގެ ކެންޓީނަށް ވެސް ވަންނަ ކަމަށާ އަދި އަނެއްބައި މީހުން އެއާޕޯޓު ތެރޭގައި ވެސް އުޅެމުންދާ ކަމަށެވެ.
އަރީފް ވަނީ ބުކިން ތައް ނަހަދާ، އޮޅުވާލައިގެން މީހުން ފޮނުވާފައި ހުރި ބައިވަރު ކޭސްތައް ހުރިކަމަށްވެސް ވިދާޅުވެފައެވެ. އަދި އެންމެ ބޮޑު މައްސަލައަކީ ބަލާ އަންނަ މީހުން ކަމަށާއި އަވަހަށް އެމީހުންގެ ޒިންމާ އަދާކޮށްފިނަމަ އެއާޕޯޓު ހުސްވެގެން ދާނެ ކަމަަށް އަރީފް ވިދާޅުވިއެވެ.
އަރީފް ވިދާޅުވީ ޔޫއޭއީ އާއި ސައުދީ ބޯޑަރު ހުޅުވާލުމުން އެއާޕޯޓަށް މިހާރު ދިމާވެފައިވާ ހަލަބޮލިވުން ހައްލުވެގެން ދާނެ ކަމަށެވެ. އެގޮތުން ސެޕްޓެމްބަރު 1 ފެށިގެން އެމަންޒަރު ނުފެންނާނެ ކަމަށް ބެލެވޭ ކަމަށް އަރީފް ވިދާޅުވިއެވެ.
އެއާޕޯޓަށް ދިމާވެފައިވާ ބައިބޯކަން ހައްލު ކުރުމަށް މަސައްކަތް ކުރަމުންދާ ކަމަށާއި މީހުން ހުސްކޮށް އެކޮމޮޑޭޓް ކޮށް އެޖަސްޓް ކުރުރުމުގެ މަސައްކަތް ކުރަމުން ދާ ކަމަށް އަރީފް ވިދާޅުވިއެވެ.
އަރީފް ވަނީ އެމީހުންނާ ހަވާލުވެފައި ތިބި މީހުން ޒިންމާ އަދާކުރުމަށް އިލްތިމާސް ކުރައްވާފައެވެ. އެގޮތުން ގަޑިއަށް އެމީހުން ބަލާދިއުމަށް އަރީފް ވަނީ އެދިވަޑައިގެންފައެވެ.
