މެއި އަދި ޖޫން 2021 އޯލެވެލް އަދި އެސްއެސްސީ އިމްތިހާނު ކަރުދާސް ރީ ޗެކް ކުރަން އެދެވޭނެ އެންމެ ފަހު ދުވަހަކީ ސެޕްޓެމްބަރު 2، 2021 ކަމަށް ޑިޕާޓްމަންޓް އޮފް ޕަބްލިކް އެގްޒޭމިނޭޝަންސް (ޑީޕީއީ) އިން ބުނެފިއެވެ.
ޑީޕީއިން ބުނީ މިއަހަރުގެ އޯލެވެލް އަދި އެސްއެސްސީ އިމްތިހާނުގައި ބައިވެރިވި ކުދިންގެ ތެރެއިން ޕޭޕަރު ރީޗެކް ކުރަން ބޭނުންވާ ކުދިންނަށް އަންނަ މަހުގެ 2 ގެ ކުރިން އެދެވޭނެ ކަމަށެވެ. އަދި އިމްތިހާނުގައި ބައިވެރިވި އަމިއްލަ ކެންޑިޑޭޓުން ރީޗެކް ކުރަން އެދޭނީ ޑީޕީއީގެ މެއިލް މެދުވެރިކޮށް ކަމަށް ވެސް ޑީޕީއިން ބުނެފައިވެއެވެ.
މިއަހަރުގެ އޯލެވެލް އިމްތިހާނުގެ ނަތީޖާ ސެންޓަރުތަކަށް ދޫކޮށްފައި ވަނީ މިމަހު 12 ވަނަ ދުވަހުއެވެ. އެހެން އަހަރުތަކުގެ އިމްތިހާނުތަކާ ހިލާފަށް މިއަހަރުގެ އޯލެވެލް އިމްތިހާނުން އަތޮޅުތެރޭގެ ރަށްރަށުން ވަނީ ވަރަށް ބޮޑު ކާމިޔާބީއެއް ހޯދާފައެވެ.
އެގޮތުން އަތޮޅުތެރޭގެ ސުކޫލުތަކުން އެހެން އަހަރުތަކާ ހިލާފަށް މިއަހަރު ގަދަ 10 އެއްގައި ހިމެނުނު ކުދިން ވަނީ އިތުރު ވެފައެވެ.
މި އަހަރު އޯލެވެލް އިމްތިހާނުގައި ވަނީ 5955 ދަރިވަރުން ބައިވެރިވެފައެވެ. މޭ 2، 2021 އިން ޖޫން 11، 2021 ގެ ނިޔަލަށް ބޭއްވި ސާނަވީ އިމްތިހާނު 234 ސެންޓަރެއްގައި ވަނީ ކުރިޔަށް ގެންގޮސްފައެވެ.
މިދިޔަ އަހަރު އޯލެވެލް އިމްތިހާނު ފަސްކޮށްފައި ވަނީ ކޮވިޑް ބަލިމަޑުކަމާ ގުޅިގެންނެވެ.
