ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް މޭ މަހުގެ ހަ ވަނަ ދުވަހު ދިން ޓެރަރިސްޓު ހަމަލާގެ ތަހުގީގަށް އެމަނިކުފާނުގެ ފަރާތްޕުޅުން ބްރިޓިޝް ކުއީން ކައުންސިލުގެ މެމްބަރު ކާސްޓީ ބްރިމެލޯ ހަމަޖައްސައިފިއެވެ.
މިއަދު ރައްޔިތުންގެ މަޖިލީހުން ބުނީ ކާސްޓީ ބްރިމެލޯގެ މަސައްކަތަކަށް ވާނީ ތަހުގީގު ހިނގަމުން އަންނަ ގޮތް ބެލުން ކަމަށެވެ.
ހަމައެއާއެކު ރާއްޖޭގެ ގާނޫނުތަކާއި ބައިނަލްއަގްވާމީ ގާނޫނުތަކުގެ އިތުރުން ވަކީލުންގެ އެހީއާއެކު ހަމަލާގެ ބައިވެރިން އިންސާފުގެ ކުރިމައްޗަށް ގެނައުމަށް މަސައްކަތް ކުރާނެ ކަމަށްވެސް މަޖިލީހުން ބުންޏެވެ.
ބްރިޓިޝް ކުއީންސް ކައުންސިލަކީ ގާނޫނީ ދާއިރާގައި އިސްކޮށް މަދުވެގެން 10 އަހަރު މަސައްކަތްކުރެއްވި ލީގަލް އޮފިސަރުންގެ ސީނިއާ މެމްބަރުންގެ މައްޗަށް އެކުލެވޭ މިނިވަން ޕެނަލެކެވެ.
ކާސްޓީ ބްރިމެލޯއަކީ ކްރިމިނަލް ލޯގެ ދާއިރާއިން މަޝްހޫރު ލޯޔަރެކެވެ.
ރައީސް ނަޝީދަށް މޭ ހަވަނަ ދުވަހުގެ ރޭ އަމާޒުކޮށް ދިން ޓެރަރިސްޓް ހަމަލާއާ ގުޅިގެން މިހާތަނަށް ޖުމްލަ ދިހަ މީހަކު ވަނީ ހައްޔަރުކޮށްފައެވެ. އަދި އެތަނުން ހަތަރު މީހެއްގެ މައްޗަށް ޕްރޮސެކިއުޓާ ޖެނެރަލްގެ އޮފީހުން ވަނީ ދައުވާ އުފުލައިފައެވެ. ދިހަ މީހުންގެ ތެރެއިން އެކަކު ވަނީ ދައުވާކުރެވޭވަރަށް އަދި ހެކި ނެތުމުން ދޫކޮށްލާފައެވެ.
ނަޝީދު އަަވަހާރަކޮށްލަން މިދިޔަ މޭމަހުގެ ހަވަނަ ދުވަހު ދިން ބޮމުގެ ހަަމަލާގައި އެ މަނިކުފާނު ވަރަށް ބޮޑަށް ޒަހަމްވި އެވެ. ހަމަލާއަށް ފަހު ރާއްޖޭން ފަރުވާ ހޯއްދެވުމަށް ފަހު އިތުރު ފަރުވާއަށް އެމަނިކުފާނު ވަޑައިގެންނެވީ ޖަރުމަނަށެވެ. އޭގެ ފަހުން މިހާރު ވަޑައިގެން ހުންނެވީ އިނގިރޭސިވިލާތުގައެވެ.
ރައްޔިތުންގެ މަޖިލީހުގެ މިއަހަރުގެ ތިން ވަނަ ދައުރުގެ ޖަލްސާތައް މިދިޔަ ހޯމަ ދުވަހު ފެށުމާއި އެކު ނަޝީދުގެ ޗުއްޓީ އިތުރުކޮށްދެއްވުން އެދި އެމަނިކުފާނު ވަނީ މަޖިލީހަށް ސިޓީއެއް ފޮނުއްވައިފަ އެވެ. ސިޓީގައި އެމަނިކުފާނު ވިދާޅުވީ ހަމަލާއާ ގުޅުން ހުރި އެންމެން ހައްޔަރުކޮށް އިންސާފުގެ ކުރިމައްޗަށް ނުގެނެވެނީސް ރާއްޖެއަށް އެނބުރި ވަޑައިގަންނަވަން އެމަނިކުފާނާއި އާއިލާ އަދި ހެޔޮއެދޭ ފަރާތްތަކުން ވެސް ޖެހިލުންވާ ކަމަށެވެ.
