ނޫސްވެރިޔާ އަހުމަދު ރިޟްވާނުގެ މައްސަލައާ ގުޅިގެން ސުވާލު ކުރުމުން ކުރީގެ ރައީސް އަބްދުﷲ ޔާމީން ހަނު ހުންނެވުމުން، ކަންބޮޑުވާ ކަމަށް މަރު ކޮމިޝަނުން ބުނެފިއެވެ.
ރިޟްވާންގެ މައްސަލާގައި ރައީސް ޔާމީން އެކޮމިޝަނަށް މިއަދު ހާޒިރުކޮށްފައި ވަނީ 02:00ގައެވެ.
"ދަ ޕްރެސް" އަށް މައުލޫމާތު ދެއްވަމުން މަރު ކޮމިޝަނުގެ މެންބަރު މިސްބާހު އަބްދުﷲ ވިދާޅުވީ، ރައީސް ޔާމީން ކޮމިޝަނަށް ހާޒިރު ކުރީ ރިޟްވާނުގެ މައްސަލައިގައި އެމަނިކުފާނުގެ މައްޗަށް ކުރާ ތުހުމަތުތަކާ ގުޅިގެން ސުވާލުކޮށް އޮޅުންފިލުވަންޖެހޭ މުހިންމު ކަންތައްތަކެއް ހުރުމުން ޖަވާބުދާރީ ވުމަށް ކަމަށެވެ.
އެ މައްސަލާގައި ރައީސް ޔާމީނުގެ މައްޗަށް ކުރާ ތުހުމަތުތަކަށް ފުރިހަމައަށް ޖަވާބުދާރީ ވެވަޑައިގަތުމަކީ ރިޟްވާނުގެ އާއިލާއާ، ދިވެހި ރައްޔިތުން ވެސް އެދޭނެ ގޮތްކަން މިސްބާހް ވިދާޅުވިއެވެ.
ނަމަވެސް ކޮމިޝަށް ހާޒިރުކޮށް ތަކުރާރުކޮށް ސުވާލުކުރުމުން ވެސް ރައީސް ޔާމީން ހަނު ހުންނެވީ ކަމަށް މިސްބާހް ވިދާޅުވިއެވެ. މިސްބާހް ވިދާޅުވީ ދައުލަތުގެ މަތީ މަގާމެއް ފުރުއްވާފައިވާ އެފަދަ ބޭފުޅަކު, އެއްބާރުލުން ނުދެއްވާ ހަނު ހުންނެވުމުން ކޮމިޝަނުން ހިތާމަކުރާ ކަމަށެވެ.
ރިޟްވާންގެ މަރުގެ މައްސަލާގައި މިހާރު ކުރިއަށް ދަނީ 2014 ވަނަ އަހަރުގެ އޯގަސްޓު މަހުގެ ހަތް ވަނަ ދުވަހުގެ ރޭ ދަންވަރުގެ ވަގުތެއްގައި، ހުޅުމާލޭގައި ރިޟްވާން ދިރިއުޅެމުން ދިޔަ 21 ނަންބަރު ފްލެޓް ކައިރިން ގަދަކަމުން މީހަކު ކާރަކަށް އަރުވަން އުޅުމުގެ ތެރޭގައި މަގުމައްޗަށް ވެއްޓިފައިވާ ވަޅީގެ ތަހުލީލުތައް ހެދުމެވެ. އެގޮތުން، އެ ވަޅި ވަނީ ރާއްޖެއިން ބޭރަށް ފޮނުވާފައެވެ. އަދި އެ ވަޅިއާ ބެހޭ ސާބިތު ހިފޭ މައުލޫމާތު ގެނެސްދިން މީހަކަށް 5 ލައްކަ ރުފިޔާގެ ފައިސާގެ އިނާމެއް ހުށަހަޅާފައެވެ.
ރިޟްވާންގެ މަރުގެ މައްސަލައިގެ ފުރިހަމަ ރިޕޯޓެއް މި އަހަރު ނިމުމުގެ ކުރިން ލިބޭނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވަނީ ވިދާޅުވެފައެވެ.
