ޓޫރިސްޓް ރިސޯޓެއްގެ ގޮތުގައި ވ. އާރަށް ތަރައްގީ ކުރުމަށް ކުއްޔަށް ދޫކޮށްގެން އެކުއިޒިޝަން ކޮސްޓްގެ ގޮތުގައި ދައުލަތަށް ލިބުނު އެއް މިލިއަން ޑޮލަރު އަމިއްލަފުޅު އެކައުންޓަށް ޖަމާކުރެއްވި ކަމުގެ ތުހުމަތުގައި ތަހުގީގު ކުރާ މައްސަލާގައި އަލުން ބަޔާން ދެއްވަން ކުރީގެ ރައީސް އަބްދުﷲ ޔާމީން ދެކޮޅު ހައްދަވައިފިއެވެ.
މިއަދު މެންރުފަހު 2:00 ގައި ރައީސް ޔާމީން ވަނީ އެ މައްސަލައާ ގުޅިގެން ފުލުހުންގެ އިދާރާއަށް ހާޒިރުކޮށްފައެވެ. އެ މައްސަލައިގެ ތަހުގީގުން އެމަނިކުފާނުގެ ގާނޫނީ ވަކީލުންގެ ރަސްމީ ޓީމް ވަނީ މީގެ ކުރިން ނުކުމެވަޑައިގެންފައެވެ.
ރައީސް ޔާމީން މިއަދު ފުލުހުންގެ އިދާރާއަށް ހާޒިރުވެވަޑައިގަތީ އާ ގާނޫނީ ވަކީލުންގެ ޓީމަކާއެކުއެވެ.
މި މައްސަލަ އަކީ ކުރިންވެސް ފުލުުހުން ފުރިހަމަ ތަހުގީގެއް ކުރުމަށް ފަހު ޕްރޮސިކިއުޓާ ޖެނެރަލްގެ އޮފީހަށް ފޮނުވާފައިވާ މައްސަލައެއް ކަމުގައި ވާތީ ފުލުހުން އެދުނުގޮތަށް އަލުން ބަޔާން ދެއްވަން ރައީސް ޔާމީން ބޭނުންފުޅު ނުވި ކަމަށް ގާނޫނީ ވަކީލުންގެ ޓީމުގައި ހިމެނޭ ގާނޫނީ ވަކީލު މުހައްމަދު ރާޣިބު އަހްމަދު ވަނީ މައުލޫމާތު ދެއްްވާފައެެވެ.
ރައީސް ޔާމީން މާފުށީ ޖަލުގައި ހުންނަވަނިކޮށްވެސް ހަތަރު ފަހަރެއްގެ މަތިން މިމައްސަލައިގެ ތަހުގީގަށް ފުލުސް އޮފީހަށް ހާޒިރު ކޮށްފައި ވެއެވެ.
ރައީސް ޔާމީންގެ ގާނޫނީ ޓީމުގެ އިސް ވަކީލު ޑރ. މުހައްމަދު ޖަމީލް އަހްމަދު ކުރިން ވިދާޅުވެފައި ވަނީ އެ މައްސަލައިގައި ރައީސް ޔާމީންގެ ފަރާތްޕުޅުން ނަގަންޖެހޭ ބަޔާން އަލުން ނަގަން ނިންމީ ޕްރޮސިކިއުޓާ ޖެނެރަލްގެ އޮފީހުން އަންގައިގެން ކަމަށް ފުލުހުން ބުނެފައިވާ ކަމަށެވެ.
ސަބަބަކީ މީގެ ކުރިން ބަޔާން ނެގި އިރު، ގާނޫނީ އިންޒާރު ދީފައި ވަނީ ގާނޫނީ ހަމަތަކުގެ މަތިން ނޫން ކަމަށް ވާތީ ކަމުގައި ފުލުހުން ބުނާ ކަމަށް ޑރ. ޖަމީލް ވިދާޅުވިއެވެ.
ގއ. ވޮޑަމުލާ ކުއްޔަށް ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ޔާމީންގެ އެކައުންޓަށް ޖަމާ ކުރި ކަމުގެ ތުހުމަތުގައި އުފުލި ދައުވާ ސާބިތުކޮށް އިއްވާފައިވާ ފަސް އަހަރުގެ ޖަލު ހުކުމެއް އެމަނިކުފާނު ގެންދަވަނީ ތަންފީޒު ކުރައްވަމުންނެވެ.
މިދިޔަ ރޯދަ މަހުގެ ގެއަށް ބަދަލުކުރި ގޮތަށް ރައީސް ޔާމީން މިވަގުތު ވެސް ހުންނެވީ ވެސް ގޭ ބަންދުގައެވެ.
