ކޮވިޑާ ގުޅިގެން މޯލްޑިވްސް މީޑިއާ ކައުންސިލް (އެމްއެމްސީ) އިން މީޑިއާތަކަށް ދޫކުރި ފާސް އުވާލަން ނިންމައިފިއެވެ.
އެމްއެމްސީން ބުނީ ކޮވިޑް-19 އާއި ގުޅިގެން މާލެ ސަރަހައްދުގައި އިއުލާންކޮށްފައިވާ ކާފިއު، މިއަދުން އިން ފެށިގެން އުވާލުމަށް ސަރުކާރުން ނިންމާފައިވާތީ، ކުރިން އަޅާފައިވާ ހާއްސަ ފިޔަވަޅުތަކުގެ ސަބަބުން، މީޑިއާތަކަށް ދިމާވާ ދަތިތަކަށް ހައްލެއް ހޯދުމުގެ ގޮތުން، ބޭރަށް ނުކުމެ އުޅޭއިރު މީޑިއާތަކުން ބޭނުންކުރުމަށް ދޫކޮށްފައިވާ ހާއްސަ ފާސް މިއަދުން ފެށިގެން އުވާލެވޭނެ ކަމަށެވެ.
އަދި ފާސް ދޫކުރުމަށްޓަކައި އެމްއެމްސީން އެކުލަވާލައި އާންމުކުރި، "އެއްގަމު އުޅަނދުފަހަރު ދުއްވުން މަނާ ގަޑިތަކުގައާއި ބޭރަށް ނުކުތުން މަނާގަޑިތަކުގައި ނޫސްވެރިން ބޭނުންކުރުމަށް މޯލްޑިވްސް މީޑިއާ ކައުންސިލުން ހާއްސަ ފާހެއް ދޫކުރުމާބެހޭ އުސޫލު" ވެސް މިއަދުން ފެށިގެން އުވާލެވޭނެ ކަމަށް އެމްއެމްސީން ބުނެއެވެ.
އެހެންކަމުން، އެއުސޫލުގެ ދަށުން މީޑިއާތަކަށް ދޫކޮށްފައިވާ އެއްވެސް ފާހެއް މިއަދުން ފެށިގެން ބޭނުން ނުކުރުމަށް އެމްއެމްސީން ވަނީ އަންގާފައެވެ.
އޭގެ އިތުރުން ކުރިއަށް އޮތް ތަނުގައި ކޮވިޑް-19 ގެ ހާލަތަކާ ގުޅިގެން އަޅާ ފިޔަވަޅުތަކުގެ ސަބަބުން ނޫސްވެރިންނަށް އަލުން ފާހެއް ބޭނުންވެއްޖެ ހިނދެއްގައި، ސަލާމަތީ ގޮތުން މިހާރަށްވުރެ ރަނގަޅު ސިފަތަކެއް (ފީޗާސް)ހިމެނޭ ފާހެއް ދޫކުރުމުގެ މަސައްކަތް މޯލްޑިވްސް ޕޮލިސް ސާވިސްގެ އެހީތެރިކަމާއެކު ކުރިއަށް ގެންދާނެ ކަމަށް އެމްއެމްސީން ބުނެއެވެ.
