ޗީފް ގައިޑް އަދި ރައީސް އިބްރާހިމް މުހައްމަދު ސޯލިހްގެ އަނބިކަނބަލުން ފަޒްނާ އަހްމަދު ހުޅުމާލެ ކޮވިޑް ފެސިލިޓީގައި ވޮލަންޓިއަރެއްގެ ގޮތުގައި މަސައްކަތް ކުރައްވަން ފައްޓަވާފިއެވެ.
މޯލްޑިވްސް ގާލް ގައިޑްސް އެސޯސިއޭޝަނުން ކުރި ޓްވީޓެއްގައި ބުނީ، ހުޅުމާލެ ކޯވިޑް ފެސިލިޓީގައި ވޮލަންޓިއަރެއްގެ ގޮތުގައި މެޑަމް ފަޒްނާ، މަސައްކަތް ކުރައްވަމުން ގެންދެވުމަކީ ޒުވާނުންނަށް އަދި ހާއްސަކޮށް އަންހެން ކަނބަލުންނަށް ދައްކުވައިދޭ ނަމޫނާއެއް ކަމަށެވެ.
މިއަދަކީ މެޑަމް ފަޒްނާގެ އުފަން ދުވަހަށް ވާއިރު އެކަމަނާގެ އުފަން ދުވަހުގެ ތަހުނިޔާ މޯލްޑިވްސް ގާލް ގައިޑްސް އެސޯސިއޭޝަނުން ވަނީ ފޮނުއްވާފައެވެ.
މިނިސްޓްރީ އޮފް ހެލްތުން މިމަހު ހަ ވަނަ ދުވަހު ކުރި އިއުލާނެއްގައި ބުނެފައިވަނީ ކޮވިޑްގެ އޮޕަރޭޝަންގައި ބައްޔަށް ޕޮޒިޓިވްވާ ފަރާތްތަކަށް ފަރުވާ ދިނުމަށް ފަންނީ އިތުރު މުވައްޒަފުން ހޯދުމަށް ބޭނުންވެފައިވާ ކަމަށެވެ. އެ މަސައްކަތުގައި ވޮލަންޓިއާ ކުރަން ބޭނުންވާ ހެލްތު ޕްރޮފެޝަނަލުންގެ ވަނަވަރު އީމެއިލް ކުރުމަށް ހެލްތުން ވަނީ އެދިފައެވެ.
އެއާއެކު ފަސްޓް ލެޑީ ފަޒްނާވަނީ އެކަމަށް ޝައުގުވެރިކަން ފާޅުކުރައްވާފައެވެ. އަދި ފުރުސަތު ދެއްވައިފި ނަމަ، އެކަމުގައި ބައިވެރިވެ ވަޑައިގަންނަވަން ތައްޔާރު ކަމަށް އޭރު ވިދާޅުވިއެވެ. ފަޒްނާ ވަނީ މީގެ ކުރިންވެސް، ކޮވިޑް-19ގެ ކަންކަމުގައި ވޮލަންޓިއާކޮށް މަސައްކަތް ކުރައްވާފައެވެ.
ހުޅުމާލެ މެޑިކަލް ފެސިލިޓީގައި ގިނަ އަދަދެއްގެ ބަޔަކަށް އަންނަނީ ފަރުވާ ދެމުންނެވެ. އޭގެތެރެއިން އެ ފެސިލިޓީގެ އައިސީޔޫގައި އަދި ވެންޓިލޭޓަރުގައި ވެސް ބައެއް މީހުންނަށް އަންނަނީ ފަރުވާ ދެމުންނެވެ.
