ކުރީގެ އޮޑިޓަ ޖެނެރަލް، އިސްމާއީލް ފަތުހީ އަވަހާރަވުމާ ގުޅިގެން މަޖިލީހުގެ މިއަދުގެ ޖަލްސާގައި ސުކޫތެއް ގެނެސްފިއެވެ.
މަޖިލިޙުގެ މިއަދުގެ ޖަލްސާގައި ފައްޓަވަމުން ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲގެ އެދިވަޑައިގަތުމަށް މެންބަރުން ވަނީ ކޮޅަށް ތެދުވެވަޑައިގެން ފަތުހީގެ ހަނދާނުގައި އެއް މިނެއްޓުގެ ސުކޫތެއް ގެނެސްފައެވެ.
އީވާ ވަނީ އިސްމާއީލް ފަތުހީ ދައުލަތަށް ކޮށްދެއްވި ހިދުމަތްތައް މަޖިލިސް ފެއްޓަވަމުން ފާހަގަކުރައްވާފައެވެ.
ފަތުހީ އަވަހާރަވުމުން ރައީސް އިބްރާހިމް މުހައްމަދު ސޯލިހް ވެސް ވަނީ އާއިލާއަށް ތައުޒިއްޔާ ފޮނުވާފައެވެ. މިގޮތުން، ރައީސް ސޯލިހް ކުރެއްވި ޓުވީޓެއްގައި ވިދާޅުވީ، ރާއްޖޭގެ މާލީ ދާއިރާއަށް ގިނަ ޚިދުމަތްތަކެއް ކޮށްދެއްވި، ނިޝާން ޢިއްޒުއްދީނުގެ ޢިއްޒަތުގެ ވެރިޔާ އިސްމާޢީލް ފަތުޙީ އަވަހާރަވުމަކީ، ރާއްޖެއަށް ލިބުނު ފޫނުބެއްދޭނެ ބޮޑު ގެއްލުމެއް ކަމަށެވެ.
އިސްމާއީލް ފަތުހީ އަވަހާރަވީ ކޮވިޑް 19އަށް ޕޮޒިޓިވްވެ ފަރުވާ ދަރުމަވަންތަ ހޮސްޕިޓަލުގައި ފަރުވާ ހޯއްދަވަމުން ގެންދަވަނި ކޮށެވެ.
އިސްމާއިލް ފަތުހީ އަކީ ކުރީގެ އުއްތަމަ ފަނޑިޔާރު އަދި ބޮޑުވަޒީރުގެ ނާއިބް އަލްއުސްތާޒް މޫސާ ފަތުހީގެ ކޮއްކޮ އެވެ.
އިސްމާއީލް ފަތުހީއަކީ ސަރުކާރުގެ މުދަލާއި ފައިސާ ހަރަދުކުރުމުގައި، ސަރުކާރުން ގެންގުޅުއްވި އުސޫލުތަކާއި ގަވާއިދުތަކުގެ ތެރެއަށް ވަރަށް ބޮޑަށް ވެދެވަޑައިގެން ހުންނެވި އަދި އޮޑިޓް ދާއިރާގެ މައުލޫމާތު ލިބިވަޑައިގެން ހުންނެވި ތަޖްރިބާކާރު ފަރާތެކެވެ. 46 އަހަރަށްވުރެ ދިގު މުއްދަތެއްގައި ސަރުކާރަށާއި ރައްޔިތުންނަށް އިހްލާސްތެރި ހިދުމަތްތަކެއް އެމަނިކުފާނުވަނީ ކޮށްދެއްވާފައެވެ.
