ދިވެހި ބަހާއި އަދަބިއްޔާތުގެ އުސްތާޒް އަބްދުﷲ ސޯދިގު (ސޯދުބެ) ކޮވިޑް-19 އަށް ޕޮޒިޓިވް ވެއްޖެއެވެ.
މައުލޫމާތު ލިބިފައިވާ ގޮތުގައި ކޮވިޑަށް ޕޮޒިޓިވްވުމާ ގުޅިގެން ސޯދުބެ އަށް ފަރުވާ ދެމުން ގެންދަވަނީ ދަރުމަވަންތަ ހޮސްޕިޓަލުގައެވެ.
އުމުރުން 85 އަހަރުގެ ސޯދުބެއަކީ ސަރުކާރަށް 55 އަހަރަށް ވުރެ ދިގު މުއްދަތެއްގައި ހިދުމަތް ކުރައްވާފައިވާ ބެފުޅެކެވެ.
ކޮވިޑް ކޭސްތައް ދުވަހުން ދުވަހަށް އިތުރުވަމުންދާއިރު އިއްޔެ 1007 މީހަކު ވަނީ ކޮވިޑަށް ޕޮޒިޓިވް ވެފައެވެ. އިއްޔެ ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވް ވި 793 މީހަކާއި، ހިންގަމުން ދާ ރިސޯޓުތަކުން 26 މީހަކާއި މީހުން ދިރިއުޅޭ ރަށްރަށުން ޕޮޒިޓިވްވި 183 މީހަކާއި ލިވަބޯޑުން ޕޮޒިޓިވްވި ފަސް މީހެކެވެ.
އިއްޔެ ޖުމްލަ ޕޮޒިޓިވްވި އަދަދު 1007 އަށް އަރާފައި ވާއިރު، ކޮވިޑް އެކްޓިވް ކޭސްގެ އަދަދު ވަނީ 15،666 އަށް އަރާފައެވެ. ހޮސްޕިޓަލުގައި އެޑްމިޓް ކޮށްފައިވާ މީހުންގެ އަދަދު 260 އަށް އަރާފައިވާއިރު ކޮވިޑް މަރުގެ ޖުމްލަ އަދަދު ވަނީ 97 އަށް އަރާފައެވެ. ޕޮޒިޓިވްވި މީހުންގެ ޖުމްލަ އަދަދު 43،782 އަށް އަރާފައި ވާއިރު ބަލިން ރަނގަޅުވި މީީހުންގެ ޖުމްލަ އަދަދު 28،013 އަށް ވަނީ އަރާފައެވެ.
