ގއ ވިލިނގިލީގައި ކަރަންޓީނުގައިތިބި ބަޔަކު ކަރަންޓީނުގެ އުސޫލާ ހިލާފަށް ބޭރަށް ނިކުމެ ކޯޓަށް ގޮސް ކައިވެނިކުރުމުން ޖޫރިމަނާކޮށްފިއެވެ.
"ދަ ޕްރެސް" އަށް މައުލޫމާތުދެމުން ފުލުހުންގެ މީޑިއާ އޮފިޝަލް ބުނެފައިވަނީ މިމަހުގެ 11 ވަނަ ދުވަހު ގއ. ވިލިނގިލިން ކަރަންޓީނުގެ އުސޫލާ ހިލާފުވެ ކޯޓަށް ގޮސް ކައިވެނިކޮށްފައިވާ 2 މީހަކު 20،000 ރުފިޔާއިން ޖޫރިމަނާކޮށްފައިވާ ކަމަށެވެ.
މާލޭގެ އިތުރުން އަތޮޅުތެރޭގައި ބަލިފެތުރުން އިތުރުވުމާ ގުޅިގެން ބޭސްފަރުވާ ނުވަތަ ޒަރޫރީ ބޭނުމަށް ފިޔަވައި އެއްރަށުން އަނެއް ރަށަށް ދަތުރުކުރުން ވަނީ މަނާކޮށްފައެވެ. އަދި ދަތުރު ކުރާނަމަ 14 ދުވަހު ކަރަންޓީނުވާންޖެހޭ ގޮތަށްވެސް ވަނީ ބަދަލުކޮށްފައެވެ. 14 ދުވަހުުގެ ކަރަންޓީނު ނިމުމަށްފަހު މުޖުތަމައުއަށް ނިކުމެވޭނީ ޕީސީއާރު ޓެސްޓް ނެގެޓިވް ވުމުންނެވެ.
ވެކްސިން 2 ޑޯޒް ފުރިހަމަކޮށް 14 ދުވަސްވުމުން ކަރަންޓީނުނުވެ ދަތުރުކުރެވޭ ގޮތަށް ހުއްދަދިނުން ވެސް ވަނީ މިހާރު މެދުކަނޑާލާފައެވެ.
އިއްޔެ އެކަނި ވެސް ރާއްޖެއިން 1007 މީހުން ކޮވިޑަށް ޕޮސިޓިވްވެފައިވާ އިރު މީގެ ތެރޭގައި އަތޮޅު ތެރޭގައި މީހުން ދިރިއުޅޭ ރަށްރަށުން ރިޕޯޓްކުރި 183 ކޭސް ވެސް ހިމެނެއެވެ. މި ވަގުތު ރާއްޖޭގެ 50 އަށް ވުރެ ގިނަ ރަށް މޮނިޓިޓަރިންގެ ހާލަތުގައި އޮތް އިރު މުޅި ރާއްޖޭގެ އެކްޓިވް ކޭސްތަކުގެ އަދަދު އުޅެނީ 15 ހާހުން މަތީގައެވެ.
