ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދިރިއުޅުއްވާ ގެ ހުންނަ ނީލޯފަރު ގޯޅި ހަނިކަމުން ސެކިއުރިޓީއަށް އުނދަގޫވާ މައްސަލަގައި މާލެ ސިޓީ ކައުންސިލުން، މިނިސްޓާ އޮފް ނޭޝަނަލް ޕްލޭނިން، ހައުސިންގް އެންޑް އިންފްރާސްޓްރަކްޗާ މުހައްމަދު އަސްލަމަށް ސިޓީއެއް ފޮނުވާފައިވާ ކަން އެނގިއްޖެއެވެ.
ސޯޝަލް މީޑިއާގައި ދައުރުވަމުން ދާ އެސިޓީ މިނިސްޓަރަށް ފޮނުވާފައި ވަނީ މިއަހަރުގެ މާޗް މަހުގެ 23 ވަނަ ދުވަހުއެވެ.
އެސިޓީގައި ބުނެފައިވަނީ ރައީސް ނަޝީދު މިހާރު ދިރިއުޅުއްވަމުން ގެންދަވާ ގެކޮޅުކަމުގައިވާ ކެނެރީގެ ހުންނަ ނީލޯފަރު ހިނގުން މަގަކީ ހަނި ގޯޅިއަކަށް ވެފާ އަދި އެ ގޯޅީގެ އެއްފަރާތުގައި ސައިކަލްޕާކުކޮށްފާ ހުރުމުގެ ސަބަބުން އެ މަނިކުފާނަށް ސެކިއުރިޓީ ފޯރުކޮށްދިނުމަށް ދަތިތަކާ ކުރިމަތިވާކަމަށް ޑިފެންސް މިނިސްޓްރީން އެ އިދާރާއަށް އަންގަވާ ކަމަށެވެ.
އޭގެ އިތުރުން އެ މަގު ސައިކަލް ޕާކު ނުކުރެވޭ މަގަކަށް ހަދާ ދިނުމަށް ވެސް އެދިފައިވާ ކަމަށް އެ ސިޓީގައި ބުނެއެވެ. އަދި ނީލޯފަރު ހިނގުން ވެހިކަލް ޕާކު ނުކުރެވޭ މަގަކަށް ބަދަލު ކުރުމަށް އެ ސަރަހައްދުގައި ޕާކު ކޮށްފައިވާ ވެހިކަލްތަށް ޕާކުކުރުމަށް ޖާގައެއް ހޯދާ ދޭން ޖެހޭނެ ކަމަށް ވެސް ސިޓީގައި ބުނެފައިވެއެވެ.
އެގޮތުން އެ ސަރަހައްދުގައި ޕާކުކޮށްފައިވާ ވެހިކަލްތަށް ޕާކުކުރުމަށް ޖާގައެއް ހެދުމަށް އެންމެ އެކަށޭނެ ޖާގައެއްގެ ގޮތުގައި ބެލެވެނީ ބިއްލޫރި ޖެހިގެއިންކަމުގާ ވާތީ އެސަރަހައްދުގައި ޕާކިން ޒޯންއެއް ހެދުމުގެ ހުއްދަ ދިނުމަށް ސިޓީގައި ވަނީ އެދިފައެވެ.
އެކަމާ ގުޅިގެން މާލެ ކައުންސިލްގެ މޭޔާ ޝިފާ އަހުމަދު އަދި ޕްލޭނިން މިނިސްޓަރު އަސްލަމްގެ ކޮމެންޓެއް ހޯދާލުމަށް "ދަ ޕްރެސް" އިން ގުޅި ނަމަވެސް ފޯނު ނަންގަވާފައެއް ނުވެއެވެ.
