ނައިބު ރައީސް ފައިސަލް ނަސީމް، ލޯކަލް ކައުންސިލް އިންތިހާބަށް ވޯޓު ލައްވައިފިއެވެ.
ނައިބު ރައީސް ފައިސަލް ވޯޓު ލައްވާފައި ވަނީ ސްޓޭޑިއަމްގައި ހުންނަ ފޮއްޓަށެވެ.
ވޯޓު ލެއްވުމަށް ފަހު ނޫސްވެރިންނާ ބައްދަލު ކުރައްވާ ވާހަކަފުޅު ދައްކަވަމުން ނައިބު ރައީސް ވަނީ އެ މީހަކު ހިޔާރު ކުރާ މީހަކަށް ވޯޓު ލުމަށް އެދިވަޑައިގެންފައެވެ. އަދި އެކި ފިކުރުގެ މީހުންގެ ތިބޭނެ ކަމަށާއި ވަކި ފިކުރެއްގެ މީހަކަށް ވީތީ ބާކީ ކޮށްގެން ނުވާނެ ކަމަށް ވެސް ނައިބު ރައީސް ވަނީ ވިދާޅުވެފައެވެ.
ނައިބު ރައީސް ވޯޓު ލައްވާފައިވާއިރު ރައީސް އިބްރާހިމް މުހައްމަދު ސޯލިހް އާއި މަޖިލީހުގެ ރައީސް މުހައްމަދު ނަޝީދު ވެސް ވަނީ ވޯޓު ލައްވާފައެވެ.
މިއަދު ލޯކަލް ކައުންސިލް އިންތިހާބުގެ ވޯޓުލުން ކުރިއަށް ދާއިރު ހެނދުނުގެ ވަގުތު ވޯޓުގެ ކަންކަން ކުރިއަށް ދާ ގޮތް ބައްލަވާ ލެއްވުމަށް ރައީސް ނަޝީދު ވަނީ މާލޭގެ އެކި ސަރަހައްދަށް ވަޑައިގެންފައެވެ.
މި އިންތިހާބުގައި އެމްޑީޕީން، 826 ކެންޑިޑޭޓުން ޕީޕީއެމްއިން 647 ކެންޑިޑޭޓުން، ޖުމްހޫރީ ޕާޓީން 115 ކެންޑިޑޭޓުން، އަދާލަތު ޕާޓީން 28 ކެންޑިޑޭޓުން، އެމްޑީއޭ އިން 20 ކެންޑިޑޭޓުން، އެމްއާރްއެމް 15 ކެންޑިޑޭޓުން، އެމްއެލްއެސްޑީޕީ 4 ކެންޑިޑޭޓުން އަދި ޑީއާރުޕީ 1 ކެންޑިޑޭޓް ވާދަކުރާނެއެވެ. އަމިއްލަ ގޮތުން 609 ކެންޑިޑޭޓަކު ބައިވެރިވިއެވެ.
މި އިންތިހާބުގައި ލޯކަލް ކައުންސިލްތަކަށް 2234 ކެންޑިޑޭޓުން ކުރިމަތި ލާފައިވާއިރު، އަންހެނުންގެ ތަރައްގީއަށް މަސައްކަތް ކުރާ ކޮމިޓީއަށް 1580 ކެންޑިޑޭޓުން ވަނީ ކުރިމަތިލާފައެވެ. އިންތިހާބުގެ ވޯޓުލުން ކުރިއާށް ދާއިރު، އިންތިހާބަކާ ނުލާ ބައެއް މެންބަރުން ވަނީ ހޮވިފައެވެ.
