އިންގްލިޝް ޕްރިމިއާ ލީގުގައި ރޭ މިހާރުގެ ޗެމްޕިއަންސް ލިވަޕޫލާއި އާސަނަލް ވާދަކުރި މެޗު 3-0 އަކުން ލިވަޕޫލް ކާމިޔާބުކޮށްފިއެވެ.
އާސަނަލްގެ ދަނޑުގައި ކުޅުނު މިމެޗުގައި ލިވަޕޫލުން މޮޅު ކުޅުމެއް ދެއްކި އިރު މެޗުގެ ފުރަތަމަ ހާފްގައި އެޓީމުން ވަނީ ލަނޑު ޖަހާނެ ފުރުސަތުތައް ވެސް ހޯދާފައެވެ. އެހެން ނަމަވެސް، ލިބުނު ފުރުސަތުތަކުގެ ބޭނުން ނުހިފި ފުރަތަމަ ހާފް ނިންމާލަން ޖެހުނީ 0-0 ގެ ސްކޯއަކުންނެވެ.
ދެވަނަ ހާފްގައި ވެސް ގިނަ އިރު ބޯޅަ ހިފަހައްޓައިގެން ގިނަ ހަމަލާތައް އުފެއްދީ ލިވަޕޫލުންނެވެ. އެހެން ނަމަވެސް، ގޯލެއް ނުޖެހި ގިނަ އިރުވަމުންދާތީ މެޗު އެއްވަރުވެގެން ނިމޭނެ ކަމަށް ބެލެވުނެވެ.
މެޗުގައި ލިވަޕޫލުން ދައްކަމުން ދިޔަ ވަރުގަދަ ކުޅުމުގެ ނަތީޖާ ފެނުނީ މެޗުގެ 62 މިނެޓްގައި ފޯވަޑް ޑިއާގޯ ޖޮޓާ ކުޅެން ނުކުތުމުންނެވެ. އޭނާ ދަނޑަށް އެރިތާ 2 މިނެޓްގެ ތެރޭގައި ވަނީ ލަނޑެއް ޖަހާ ލިވަޕޫލަށް ނަގާ ދީފައެވެ. މެޗުގެ 64 ވަނަ މިނެޓްގައި ޖޮޓާ ކާމިޔާބުކޮށް ދިން މިލަނޑަކީ ޒުވާން ޑިފެންޑަރު ޓްރެންޓް އެލެގްޒެންޑާ އާނޯލްޑް ނަގާ ދިން ހުރަހަކުން ޖެހި ލަނޑެކެވެ.
ލިވަޕޫލުން ފުރަތަމަ ލަނޑު ޖެހުމުން ވެސް އާސަނަލްގެ ކުޅުން ރަނގަޅުނުކުރުމުގެ ނަތީޖާއަކަށްވީ 68 ވަނަ މިނެޓްގައި މިސްރުގެ ފޯވަޑް މުހައްމަދު ސަލާހް ލަނޑެއް ޖަހާ ލިވަޕޫލަށް 2-0 ގެ ލީޑެއް ހޯދައިދިނުމެވެ. މިއީ މިސީޒަންގައި ލީގުގައި ސަލާހް ޖެހި 18 ވަނަ ލަނޑެވެ.
އެއަށް ފަހު ޖޮޓާ ވަނީ އަނެއްކާ ވެސް ލަނޑެއް ޖަހާ ނަތީޖާ 3-0 އަކަށް ހަދާފައެވެ.
އާސަނަލްގެ މައްޗަށް ހޯދި މޮޅާއި އެކު ލިވަޕޫލް މިވަނީ ގަދަ ހަތަރަކާއި ދެ ޕޮއިންޓް ގާތަށް ޖެހިލާފައެވެ. އެޓީމު މިހާރު އޮތީ ލީގު ތާވަލުގެ ފަސް ވަނައިގައެވެ. އެއީ ކުޅުނު 30 މެޗުން 49 ޕޮއިންޓް ހޯދައިގެންނެވެ.
ރޭގެ މެޗުން ބަލިވި އާސަނަލް އޮތީ ތާވަލުގެ 9 ވަނައިގައެވެ. އެއީ 30 މެޗު ކުޅެ 42 ޕޮއިންޓް ހޯދައިގެންނެވެ. ލިވަޕޫލް އަތުން ބަލިވުމާއެކު ގަދަ ފަހެއްގައި އޮވެ ސީޒަން ނިންމާލުމަށް އާސަނަލް ކުރަމުންދާ އުއްމީދު މިވަނީ ފަނޑުވެފައެވެ.
