ޅ. ހިންނަވަރުން ސްޓްރޯކެއް ޖެހި މަރުވެގެން އެ އަތޮޅު ހޮސްޕިޓަލަށް ގެނައި މީހަކު ކޮވިޑް-19އަށް ޕޮޒިޓިވް ވެއްޖެއެވެ.
"ދަ ޕްރެސް" އަށް މައުލޫމާތު ދެއްވަމުން ޅ. އަތޮޅު ހޮސްޕިޓަލުގެ އޮފިޝަލަކު ވިދާޅުވީ ސްޓްރޯކެއްޖެހި އެ ހޮސްޕިޓަލަށް އިއްޔެގެ ވަގުތެއްގައި މީހެއް ގެނެއި ކަމަށާއި އަދި އެމީހާ ހޮސްޕިޓަލަށް ގެނައި އިރު މަރުވެފައިވާ ކަމަށެވެ.
ޅ. އަތޮޅުގައި ކޮވިޑް ކޭސްތައް ފެންނަމުންދާތީ އުސޫލާ އެއްގޮތަށް އެމީހާ ކޮވިޑަށް ޓެސްޓުކޮށްފައިވާ ކަމަށް އޮފިޝަލް ވިދާޅުވިއެވެ. އަދި އެޓެސްޓުގެ ނަތީޖާ ރޭގެ ވަގުތެއްގައި އައިސްފައިވާ ކަމަށާއި އަދި ނަތީޖާ ޕޮޒިޓިވް ވެފައިވާ ކަމަށް އޭނާ ވިދާޅުވިއެވެ.
އޮފިޝަލް ވިދާޅުވިގޮތުގައި މަރުވެފައިވަނީ އުމުރުން 64 އަހަރުގެ ދިވެހި ފިރިހެނެކެވެ.
އޭގެ އިތުރުން އެމީހާގެ ކަށުކަމާކެމީގެ ކަންކަން ކުރިއަށް ގެންދިޔައީ އެޗްޕީއޭގެ ގައިޑްލައިންތަކާ އެއްގޮތުގެ މަތިން ކަމަށް އޮފިޝަލް ވިދާޅުވިއެވެ.
ސްޓްރޯކް ޖެހިގެން މަރުވި ހިންނަވަރު މީހާއަކީ ކޮވިޑް މަރެއްގެ ގޮތުގައި ހެލްތް ޕްރޮޓެކްޝަން އެޖެންސީ އެޗްޕީއޭއީން އަދި ކަނޑައެއް ނާޅާއެވެ.
ރާއްޖޭގައި ކޮވިޑްގައި ޖުމްލަ 66 މީހުން މިިހާތަނަށް ވަނީ މަރުވެފައެވެ.
