ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު، އިއްޔެ އެންޓި ކޮރަޕްޝަން ކޮމިޝަން (އޭސީސީ) އަށް ހާޒިރު ކުރީ ކުރަމުން ދިޔަ ތަހުގީގަކަށް ދުރަލާ ޕްލޭން ކުށްގެން ކަމަށް އޭސީސީއިން ބުނެފިއެވެ.
އޭސީސީން މިއަދު ނެރުނު ބަޔާނެއްގައި ބުނެފައި ވަނީ އެ ކޮމިޝަނުން ތަހުގީގު ކުރާ މައްސަލަތަކަކީ ދުރާލާ އިންތިޒާމު ކޮށްގެން ކަނޑައަޅާފައިވާ އުސޫލުތަކެއްގެ ތެރެއިން ކުރިއަށް ގެންދާ ތަހުގީގުތަކެއް ކަމަށެވެ. މައްސަލަތަކުގެ ތަހުގީގު ފަށާނެ ދުވަހެއް ނުވަތަ ނިންމާނެ ދުވަހެއް ކަނޑައަޅައި، މައްސަލަތައް ތަރުތީބު ކުރަނީ ސިޔާސީ ވިސްނުމަކަށް ނުވަތަ އިންތިހާބުތަކުގައި ވާދަކުރާ ކެންޑިޑޭޓުންނަށް އަމާޒުކޮށްގެން ނޫން ކަމަށެވެ.
އެކޮމިޝަނުން ބުނީ ބަލަމުންދާ މައްސަލަތަކާ ގުޅިގެން ކޮމިޝަނަށް ހާޒިރު ކުރާ މީހުންނާއި އަދި ހާޒިރު ކުރާ ސަބަބެއް އެއްވެސް އިރެއްގައި މީޑިއާއަށް ހާމަ ނުކުރާކަމަށެވެ. އަދި މި މައްސަލައިގައި ވެސް އަމަލު ކޮށްފައި ވަނީ އެ އުސޫލުން ކަމަށެވެ. އޭސީސީން އެހެން ބުނި އިރު މީޑިއާއިން ސުވާލު ކުރުމުންވެސް މައުލޫމާތު ސާފުކޮށްދިނުމުގެ ބަދަލުގައި ބުނީ، މައްސަލަ އަކީ ކޮބައިކަން މީޑިއާއިން ބުނީމައި އެކަން ބަލައިދޭނެ ކަމަށެވެ. ނަމަވެސް އޭސީސީއަށް ނޭނގޭ ކަމަކީ، އޭސީސީން ހާމަ ނުކުރާހާ ހިނދަކު، އޭސީސީން ބަލަމުން ދާ މައްސަލައިގެ ނަން ސުވާލު ކުރާ މީހާއަށް ނޭނގޭނެ ކަމެވެ.
ޑރ. މުއިއްޒު ކޮމިޝަނަށް ހާޒިރު ކޮށްފައި ވަނީ، ކުރިއަށް އޮތް ލޯކަލް ކައުންސިލް އިންތިހާބާ ދިމާކޮށް ނުފޫޒު ފޯރުވަން ކަމަށް ވާހަކަ ދެކެވެމުން ދާއިރު، ލޯކަލް ކައުންސިލް އިންތިހާބު އިއުލާނު ކުރި ފަހުން، މީގެ ކުރިންވެސް މުއިއްޒު އޭސީސީއަށް ހާޒިރު ކޮށްފައިވެއެވެ. އެއީވެސް ބަލަމުންދާ މައްސަލައަކާ ގުޅިގެން ކަމަށް ބުނެއެވެ. ބަލަނީ ކޮން މައްސަލައެއް ކަމެއް އަދިވެސް ނުބުނެއެވެ.
މުއިއްޒު އެ ކޮމިޝަނަށް ހާޒިރު ކޮށްފައި ވަނީ ކުރިއަށް އޮތް ލޯކަލް ކައުންސިލް އިންތިހާބަށް ނުފޫޒު ފޯރުވުމަށް ކަމަށާއި އެއީ ވަކި ފަރާތަކުން އަންގައިގެން ކޮމިޝަނުން ކުރާ ކަމެއް ކަމަށް ދެކެވޭ ވާހަކަތަކަކީ، ހަގީގަތާ ހިލާފަށް އަދި އާންމުންގެ މެދުގައި ކޮމިޝަނާ މެދު ނުބައި ތަސައްވުރެއް އުފެއްދުމަށް ދައްކާ ވާހަކައެއް ކަމަށް ކޮމިޝަނުން ބުނެއެވެ.
ދެކެވެމުންދާ ވާހަކަތަކަށް އޭސީސީން ރައްދު ދީފައި ވާއިރު، މުއިއްޒު އިއްޔެ އޭސީސީއަށް ހާޒިރުވެވަޑައިގަތުމަށް ފަހު ވިދާޅުވީ އޭނާ އޭސީސީއަށް ހާޒިރު ކުރީ ސިޔާސީ ބޭނުމަށް ސަރުކާރުގެ ނުފޫޒު ތެރެއިން ކަމަށެވެ. އަދި ސަރުކާރުގެ މަގުސަދު އެނގިވަޑައި ނުގަންނަވާ ކަމަށާއި ނަމަވެސް ސަރުކާރުން އޭނާ އަށް އުނދަގޫ ކުރަނީ އޭނާ އިންތިހާބުގައި ވާދަކުރއްވާތީ ކަމަށެވެ.
ރާބޯކަށް ނޫނެ މަ އެރީ ވާ ގޮވާތީ ނުނިދިގެންނޭ