ގއ. ކޮނޑޭ އިސް މެޖިސްޓްރޭޓް މުހައްމަދު އިބްރާހީމުގެ ސުލޫކީ މައްސަލައެއް ބަލަން ފަށާފައިވާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ބުނެފިއެވެ.
ޖޭއެސްސީން ބުނީ ކޮނޑޭ އިސް މެޖިސްޓްރޭޓްގެ މައްސަލައެއް ބަލަން ފަށާފައިވަނީ މުހައްމަދު އިބްރާހީމާ ހަވާލުކޮށްފައިވާ ކޯޓުތަކަށް ދަތުރު ކުރަނީ ކަނޑައެޅިފައިވާ އުސޫލުތަކާ ހިލާފަށް ކަމަށާއި، ކޯޓަށް ހުށަހެޅޭ މައްސަލަތައް ނިންމުމުގައި އޭނާ އަދާކުރަންޖެހޭ ޒިންމާއަށް އިހުމާލުވެފައިވާ ކަމަށް ތުހުމަތު ކުރެވޭ މައްސަލައެއްގައި ކަމަށެވެ.
އޭގެ އިތުރުން ކޯޓުގެ މުވައްޒަފުންނާއި ކޯޓަށް ހުށަހެޅޭ މައްސަލަތަކުގެ ވާހަކަ އިސްމެޖިސްޓްރޭޓް ކޯޓުން ބޭރުގައި ދައްކާ މައްސަލަ ވެސް ތަހުގީ ކުރުމަށް ނިންމާފައިވާ ކަމަށް ޖޭއެސްސީން ވިދާޅުވެއެވެ.
ޖޭއެސްސީން ބުނީ ސުލޫކީ މައްސަލަ ބެލުމަށް މިތަހުގީގު ކޮމިޓީ އެކުލަވާލާފައިވަނީ މިދިޔަ މަހު 21 ވަަނަ ދުވަހު ބޭއްވި ޖޭއެސްސީގެ މި އަހަރުގެ ހަތަރު ވަނަ ބައްދަލުވުމުގައި ކަމަށެވެ.
ފަހަކަށް އައިސް ޖޭއެސްސީން އަންނަނީ މިފަދަ ގިނަ މައްސަލަތަކެއް ބަލަމުންނެވެ.
