ފިޝަރީޒް މިނިސްޓަރު ޒަހާ ވަހީދު، ސަރުކާރުގެ އިތުބާރު ގެއްލޭ ވަރުގެ ކަމެއް ކުރައްވާފައި ނުވާ ކަމަށާއި ޒަހާއަށް ސަރުކާރުގެ އިތުބާރު އެބައޮތް ކަމަށް ރައީސް އޮފީހުގެ ތަރުޖަމާން މަބްރޫކް އަޒީޒް ވިދާޅުވެއްޖެއެވެ.
'"ދަ ޕްރެސް" އަަށް މައުލޫމާތު ދެއްވަމުން މަބްރޫކް ވިދާޅުވީ އިތިބާރު ނެތް ވަޒީރަކު މަގާމުގައި ނުބަހައްޓަވާނެ ކަމަށް އިއްޔެ ބޭއްވި ނޫސްވެރިންގެ ބައްދަލުވުމުގައި ވެސް ރައީސް އިބްރާހިމް މުހައްމަދު ސޯލިހު ވަރަށް ސާފުކޮށް ވިދާޅުވެފައިވާ ކަމަށެވެ.
އެގޮތުން މިނިސްޓަރު ޒަހާ، އިތުބާރު ގެއްލޭ ވަރުގެ ކަމެއް ކުރައްވާފައި ވާ ނަމަ މަގާމުގައި ނުހުންނަވާނެ ކަމަށް މަބްރޫކު ވަނީ ވިދާޅުވެފައެވެ.
11 މެންބަރުންގެ ސޮޔާ އެކު މިނިސްޓަރު ޒަހާގެ އިތުބާރު ނެތްކަމުގެ މައްސަލަ މަޖިލީހަށް ވައްދައިފައި ވަނީ އިދިކޮޅު ޕީޕީއެމް އަދި ޕީއެންސީ ކޯލިޝަނުންނެވެ.
އިދިކޮޅުން ހުށަހެޅި އެ މައްސަލައިގައި ބުނެފައިވަނީ މަސްވެރިކަމުގެ ސިނާއަތުގައި މަސައްކަތް ކުރަމުންދާ ދިވެހި މަސްވެރިންނާއި މަސްވެރި އާއިލާތަކަށް ސަރުކާރުން ވެފައިވާ ވައުދުތައް ފުއްދުމަށް ކުރަންޖެހޭ މަސައްކަތްތައް ނުކުރެވި، މަސްވެރިންނަށް ދޭންޖެހޭ ހިދުމަތްތައް ނުދެވޭކަމަށެވެ.
އަދި މަސްވެރިން ބާނާ މަހަށް ހަމައަގު ހޯދައިނުދީ، މަސްވެރިންގެ ޖީބަށް ޑޮލަރު ވަންނާނެ ގޮތް ނުހަދައި، ދިވެހި އިގްތިސޯދުގެ ރޫފަހެޔޮ ނުކުރެވި، މަސްވެރިކަމުގެ ސިނާއަތުން ނުރެވޭ ފައިދާ ބޮޑު ނުކުރެވި، މަސްވެރިކަމަށް ދުނިޔޭގެ ބާޒާރުގައި ލިބެންޖެހޭ ބޮޑު އަގު ދިވެހި މަސްވެރިންނަށް ހޯދައި ނުދެވޭކަމަށެވެ.
މީގެ އިތުރުން މަސްވެރިކަމާގުޅޭ ސަރުކާރުގެ ވައުދުތައް ނުފުއްދައި، މަސްވެރިކަން ކުރިއެރުމުގެ ޒިންމާ މިނިސްޓަރު ޒަހާ އަދާ ނުކުރެވޭތީ އެކަމަށް އެމަގާމުގައި ހުންނެވުމަކީ ދިވެހި މަސްވެރިންނާއި މަސްވެރި އާއިލާތައް އިތުރަށް ނިކަމެތި ވެގެންދާނޭކަމެއްކަމަށްވެސް އެ ކޯލިޝަނުން ހުށަހެޅި މައްސަލައިގައިވެއެވެ.
