އދ. ހަންޏާމީދޫން ފަތުރުވެރިއަކު ކޮވިޑަށް ޕޮޒިޓިވް ވެއްޖެއެވެ.
"ދަ ޕްރެސް" އަށް މައުލޫމާތު ދެއްވަމުން ހަންޏާމީދޫގެ ހެލްތު ސެންޓަރުގެ މީޑިއާ އޮފިޝަލް އަހުމަދު ތޮލްހަތު ވިދާޅުވީ ފަތުރުވެރިޔާ ޕޮޒިޓިވްވެފައިވާ ކަން އެނގިފައިވަނީ އެމީހާ ފުރުމުގެ ކުރިން ނެގި ސާމްޕަލުން ކަމަށެވެ.
މި ކޭސް އާ ގުޅިގެން ޑައިރެކްޓް ކޮންޓެކްޓް ގެ ގޮތުގައި 7 މީހަކު ފާހަގަކުރެވިފައިވާ ކަމަށާއި އަދި އެމީހުން މިހާރު ކަރަންޓީނު ކުރެވިފައިވާ ކަމަށް ތޮލްހަތު ވަނީ ވިދާޅުވެފައެވެ.
ރާއްޖެގައި ކޮވިޑް ކޭސްތައް އިތުރުވަމުން ދާއިރު އިއްޔެ ރާއްޖެއިން ޖުމްލަ 209 މީހަކު ވަނީ ޕޮޒިޓިވްވެފައެވެ. ޕޮޒިޓިވް ވި 209 މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 101 މީހަކާއި އަތޮޅުތަކުން ޕޮޒިޓޮވްވި 108 މީހުންނެވެ.
މިއާއެކު ރާއްޖެއިން މި ބައްޔަށް ޕޮޒިޓިވް ވި މީހުންގެ ޖުމްލަ އަދަދު މިވަނީ 17,716 އަށް އަރާފައެވެ. އޭގެ ތެރެއިން ބަލިން ރަނގަޅުވި ޖުމްލަ މީހުންގެ އަދަދު ވަނީ 15،291 އަށް އަރާފައެވެ. މިވަގުތު މިބަލި ޖެހިފައި ތިބި މީހުންގެ އަދަދު 2360 ގައި އުޅޭ އިރު، އެމީހުންގެ ތެރެއިން 190 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ.
މިހާރު ރާއްޖެއިން ކޮވިޑް ބަލީގައި މަރުވި މީހުންގެ އަދަދު މިހާރު ވަނީ 59 އަށް އަރާފައެވެ. މަރުވި މީހުންގެ ތެރޭގައި ހިމެނެނީ 51 ދިވެހިންނާއި 7 ބިދޭސީންނެވެ. މަރުވި ބިދޭސީންގެ ތެރޭގައި ހިމެނެނީ ބަންގްލަދޭޝްގެ 6 މީހަކާއި ފިލިޕީންސް މީހެކެވެ. ރާއްޖެއިން ކޮވިޑް ޖެހިގެން ނިޔާވި 59 މީހުންގެ ތެރެއިން 56 މީހަކު މާލެ ސަރަހައްދުގައި މަރުވެފައި ވާއިރު، 2 މީހަކު މަރުވީ އަތޮޅު ތެރޭގެ ރަށްތަކުންނެވެ.
