އިންގްލިޝް ޕްރިމިއާ ލީގުގައި މިއަދު ޓޮޓެންހަމްއާއި ވެސްޓް ބްރޯމް ވާދަކުރި މެޗު 2-0 އަކުން ޓޮޓެންހަމް ކާމިޔާބުކޮށްފިއެވެ.
މިއީ ލީގުގައި ޓޮޓެންހަމްއިން އެންމެ ފަހުން ކުޅުނު ހަތަރު މެޗުގެ ތެރެއިން މޮޅުވި ފުރަތަމަ ފަހަރެވެ. މިއަދުގެ މެޗުގައި އެޓީމަށް ލަނޑު ޖަހާ ދިނީ ޓީމުގެ ފޯވަޑުން ކަމަށްވާ ހެރީ ކޭންއާއި ސޮން ހިއުންގް މިންއެވެ.
ފުރަތަމަ ހާފްގައި ޓޮޓެންހަމްގެ ފަރާތުން ވެސްޓް ބްރޯމްގެ ގޯލާ އަމާޒުކޮށް ހަމަލާތައް އުފެއްދި ނަމަވެސް މެޗުގެ ފުރަތަމަ ހާފް ނިމުނީ ދެ ޓީމު ކުރެ އެއް ޓީމަކަށް ވެސް ލަނޑެއް ނުޖެހި 0-0 އަކުން އެއްވަރުވެގެންނެވެ.
އެހެން ނަމަވެސް މެޗުގެ ދެވަނަ ހާފް ފެށުނު ތަނާހެން ޓޮޓެންހަމްއިން ވަނީ ކައިރި ކައިރީގައި ދެ ލަނޑު ޖަހާފައެވެ. މި ގޮތުން، އެޓީމުގެ ފުރަތަމަ ލަނޑު ޖަހާ ދިނީ ތަޖުރިބާކާރު ފޯވަޑް ހެރީ ކޭންއެވެ. މިއީ އޭނާ ޓޮޓެންހަމްއަށް ޖަހާ ދިން 208 ވަނަ ލަނޑެއެވެ.
ކޭން ލަނޑު ޖެހިތާ ހަތަރު މިނެޓް ފަހުން މެޗުގެ 58 ވަނަ މިނެޓްގައި ޓޮޓެންހަމުން އުފެއްދި ކައުންޓާ އެޓޭކެއް ގޯލުގެ ތެރެއަށް ވައްދާލައިގެން އެޓީމަށް 2-0 ގެ ލީޑެއް ނަގާ ދިނީ ސައުތް ކޮރެއާގެ ފޯވަޑް ސޮންއެވެ.
ވެސްޓް ބްރޯމުން މިމެޗުގައި ދެލަނޑު ޖެހި ނަމަވެސް މި ދެލަނޑަކީ ވެސް އޮފްސައިޑް ދެ ލަނޑުގެ ގޮތުގައި މެޗުގެ ރެފްރީ ވަނީ ނިންމާފައެވެ.
މިމެޗުން މޮޅުވެ ޓޮޓެންހަމް މިވަނީ ތާވަލުގެ 7 ވަނަ އަށް ޖެހިލާފައެވެ. އެއީ ކުޅުނު 22 މެޗުން 36 ޕޮއިންޓް ހޯދައިގެންނެވެ.
މިމެޗުން ބަލިވި ވެސްޓް ބްރޯމް އޮތީ ތާވަލުގެ ފުލުން ދެވަނައިގައެވެ. އެއީ ކުޅުނު 23 މެޗުން 12 ޕޮއިންޓް ލިބުމުންނެވެ.
