ފާއިތުވި ދެތިން ހަފްތާގައި ރާއްޖޭއިން ފެނިފައިވާ ކޮވިޑް ކޭސްތަކުގެ އަދަދު އިތުރުވުމާއެކު މިމަހުގެ 7 ވަނަ ދުވަހުން ފެށިގެން ރާއްޖޭގައި މީހުން އުޅޭ ހުރިހާ ރަށެއްގައި ބޭރަށް ނިކުމެ އުޅޭ އިރު އެންމެން މާސްކް އެޅުން މަޖުބޫރު ކޮށްފިއެވެ.
ދަރުބާރު ގޭގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހެލްތް އެމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާނު ޑރ. ފާތުމަތު ނަޒުލާ ރަފީޤު ވިދާޅުވީ، ކޭސްތައް އިތުރުވުމުގެ ސަބަބުން އެޗްޕީއޭއިން އަޅާފައިވާ ފިޔަވަޅުތައް މިމަހުގެ 3 ވަނަ ދުވަހުން ފެށިގެން ވަރުގަދަކުރުމަށް ނިންމާފައިވާ ކަމަށެވެ.
ޑރ. ނަޒުލާ ވިދާޅުވީ، މާލޭ ސަރަހައްދުގައި އަޅާ ފިޔަވަޅުތަކުގެ އިތުރުން އަންނަ އާދިއްތަ ދުވަހުން ފެށިގެން މީހުން ދިރިއުޅޭ ހުރިހާ ރަށެއްގައި ގެއިން ބޭރުގައި އުޅޭއިރު މާސްކު އެޅުން މަޖުބޫރު ކުރުމަށް ނިންމާފައިވާ ކަމަށެވެ.
މިކަމާ ގުޅޭ ގޮތުން ހެލްތް އެމަޖެންސީ އޮޕަރޭޝަން ސެންޓަރުން ނެރުނު އިއުލާނެއްގައި ބުނެފައިވަނީ އާންމު ސިއްހަތު ރައްކާތެރިކުރުމުގެ ޤާނޫނުގެ 34 ވަނަ މާއްދާއަށް ރިޢާޔަތް ކޮށް، އެ ޤާނޫނުގެ 12 ވަނަ މާއްދާގެ (ހ) ގެ (3) ވަނަ ނަންބަރުގެ ދަށުން، ޑިރެކްޓާ ޖެނެރަލް އޮފް ޕަބްލިކް ހެލްތަށް ލިބިދޭ ބާރުގެ ދަށުން، ފެބްރުއަރީ 7 ވަނަ ދުވަހުން ފެށިގެން ވަކިގޮތެއް އަންގަންދެން، ގެއިން ބޭރުގައި އުޅޭއިރު، އަނގަޔާއި ނޭފަތާއި ދަތްދޮޅި ނިވާވާ ގޮތަށް މާސްކު އެޅުމަށް މަޖުބޫރު ކުރާ ކަމަށެވެ.
އެޗްޕީއޭގެ އިއުލާނުގައި ބުނެފައިވަނީ އަންނަނިވި ހާލަތް ތަކުގައިވާ ފަރާތްތައް، ގެއިން ބޭރުގައި އުޅޭއިރު މާސްކު އެޅުމުން އިސްތިސްނާ ވާނެ ކަމަށެވެ.
- އުމުރުން 2 (ދޭއް) އަހަރުން ދަށުގެ ކުޑަކުދިން.
- ކަސްރަތު ކުރަން އުޅޭ މީހުން ކަސްރަތުކުރާ ވަގުތު.
- އެހެން މީހެއްގެ އެހީއާ ނުލައި މާސްކު އަޅައި، މާސްކު ނުނެގޭ މީހުން.
- ހޮޓާ، ކެފޭ، ރެސްޓޯރަންޓް، ފަދަ ކާބޯތަކެތީގެ ހިދުމަތްދޭ ތަންތަނުން ހިދުމަތް ހޯދާ ފަރާތްތައް، ހިދުމަތް ހޯދާ ވަގުތު
ރާއްޖޭގައި އިއްޔެ އެކަނި ވެސް 200 އަށް ވުރެ ގިނަ ކޮވިޑް ކޭސް ފެނިފައިވާ އިރު އަތޮޅު ތެރެއިން ފެންނަމުން އަންނަ ކޭސްތައް ވެސް އަންނަނީ އިތުރުވަމުންނެވެ.
