ބ. އަތޮޅުގައި ހިމާޔަތް ކޮށްފައިވާ ހަނިފަރު ހިމެނޭ ސަރަހައްދަށް ގަވައިދާ ހިލާފަށް ވަނުމުން ޔޮޓެއް ޖޫރިމަނާ ކޮށްފިއެވެ.
އެންވާރަމަންޓަލް ޕްރޮޓެކްޝަން އޭޖެންސީ (އީޕީއޭ) އިން ބުނީ މިދިޔަ މަހުގެ ހަތަރު ވަނަ ދުވަހު ޔޮޓެއް ހަނިފަރު ސަރަހައްދަށް ވަން ކަމަށާއި އެ ސަރަހައްދަށް ވަދެފައި ވަނީ "ވިޓާލިއާ 2 ލަންޑަން" ނަމަކަށް ކިޔާ ޔޮޓެއް ކަމަށެވެ.
އީޕީއޭއިން ބުނީ ޔޮޓް ހަނިފަރަށް ވަނުމުގެ އިތުރުން އޭގައި ތިބި މީހުން އެ ސަރަޙައްދަށް ފައިބައި ކައިޓް ސާފްކޮށް ހަނިފަރަށް އަރައި އެހެން ހަރަކާތްތަކެއް ހިންގައިފައިވާ ކަމަށެވެ.
އަދި ހަނިފަރު ރައްކާތެރިކަމުގެ ގަވައިދާ އެ ފަރާތް ހިލާފުވެފައި ވާތީ އެ ޔޮޓްގެ ޝިޕިން އޭޖެންޓް، 6000 ރުފިޔާއިން ޖޫރިމަނާ ކޮށްފައިވާ ކަމަށްވެސް އީޕީއޭން ބުނެއެވެ. އެ ޔޮޓްގެ ޝިޕިން އޭޖެންޓަކީ އޭޝިއާ ޕެސިފިކް ސްޕަ ޔޮޓްސް ޕްރައިވެޓް ލިމިޓެޑެވެ.
އީޕީއޭން ވަނީ ޖޫރިމަނާ ފައިސާ އިއްޔެއިން ފެށިގެން 30 ދުވަހުގެ ތެރޭގައި ދައްކަން އެޖެންޓަށް އަންގާފައެވެ.
