ބޭންކް އޮފް މޯލްޑިވްސް (ބީއެމްއެލް) ގެ ޑެބިޓް އަދި ކްރެޑިޓް ކާޑު ބޭނުން ކޮށްގެން ވިޔަފާރިކުރާ ކަސްޓަމަރުންނަށް ހާއްސަ ޕްރޮމޯޝަނެއް މިއަދު ފަށައިފިއެެވެ.
ބީއެމްއެލް އިން ބުނީ، މި ޕްރޮމޯޝަނުގައި ބީއެމްއެލްގެ ޑެބިޓް އަދި ކްރެޑިޓް ކާޑު ބޭނުން ކޮށްގެން ވިޔަފާރި ކުރާ ކަސްޓަމަރުންގެ މެދުގައި ކޮންމެ ހަފްތާއަކު ގުރެއް ނަގާނެ ކަމަށެވެ. އެ ގޮތުން ނެގޭ ގުރުން ހޮވޭ ފަރާތަކަށް 5،000 ރުފިޔާގެ ގިފްޓް ކާޑެއް ދިނުމަށް ހަމަޖެހިފައިވާ ކަމަށް ބީއެމްއެލް އިން ބުނެއެވެ.
މި ޕްރޮމޯޝަން ކުރިއަށް ދާނީ 9 ހަފްތާގެ މުއްދަތައް ކަމަށާއި އެ 9 ހަފްތާގައިވެސް ނަސީބުވެރިން ހޮވުމަށް ވަނީ ހަމަޖެހިފައި ކަމަށް ބީއެމްއެލުން ބުނެއެވެ. އަދި ޕްރޮމޯޝަން ނިމުމުން ގުރުއަތުން ހޮވޭ ފަރާތަކަށް 20،000 ރުފިޔާގެ ގިފްޓް ކާޑެއް ދިނުމަށް ވެސް ވަނީ ނިންމާފައެވެ.
މި ޕްރޮމޯޝަންގައި ހިމެނުމަށް ހަމަޖެހިފައި ވަނީ ކާޑު ބޭނުންކޮށްގެން ބީއެމްއެލްގެ ކަސްޓަމަރުން ރާއްޖޭގައި ކުރާ ވިޔަފާރި މުއާމަލާތްތައް ކަމަށް އެ ބޭންކުން ބުނެއެވެ. މި ޕްރޮމޯޝަން އަންނަ މާޗު މަހުގެ 28 ވަނަ ދުވަހާ ހަމަޔަށް ކުރިއަށް ދާނެއެވެ. ޕްރޮމޯޝަނާ ގުޅޭ ގޮތުން އިތުރު މައުލޫމާތު މި ލިންކުން ލިބޭނެއެވެ.
