އެމެރިކާގެ އާ ރައީސް ޖޯ ބައިޑަން، މަގާމުގެ ހުވާ ކުރެއްވުމަށް މިމަހުގެ 20 ވަނަ ދުވަހުގެ ރޭ ކުރިއަށް ދިޔަ ރަސްމިއްޔާތުގެ ސަލާމަތީ ކަންކަން ބަލަހައްޓަމުން ދިޔަ ނޭޝަނަލް ގާޑުންގެ އަސްކަރީ ފައުޖުގެ 150 އަށް ވުރެ ގިނަ ސިފައިން، ކޮރޯނާވައިރަސް ޑިޒީޒް (ކޮވިޑް-19) އަށް ޕޮޒިޓިވްވެއްޖެއެވެ.
ކުރީގެ ރައީސް ޑޮނާލްޑް ޓްރަމްޕްގެ ސަޕޯޓަރުން، ޖެނުއަރީ 6 ވަނަ ދުވަހު، ކެޕިޓޮލް ބިލްޑިންގަށް ދިން އުދުވާނީ ހަމަލާތަކާ ގުޅިގެން، އެމެރިކާގެ ސަރުކާރުން ވަނީ، ބައިޑަން ހުވާ ކުރެއްވުމުގެ ރަސްމިއްޔާތުގެ ސަލާމަތީ ފިޔަވަޅުތައް އިންތިހާއަށް ވަރުގަދަކޮށްފައެވެ. އެގޮތުން، ވަކި ސަރަހައްދުތަކެއްގައި ފެންސްޖަހާ، ކަށިނަރު ދެމިއެވެ. ނޭޝަނަލް ގާޑުން ފޯރިމަރަމުންދިޔަ ޗެކްޕޯސްޓްތައްވެސް ގާއިމު ކުރިއެވެ.
މި ރަސްމިއްޔާތުގެ ސަލާމަތީ ކަންކަން ބެލެހެއްޓުމަށް ނޭޝަނަލް ގާޑުންގެ 25000 އެއްހާ ސިފައިން ހަރަކާތްތެރިވެފައި ވާއިރު، މީގެ ތެރެއިން ޕޮޒިޓިވްވާ ސިފައިންގެ އަދަދު އަދިވެސް އިތުރުވުން އެކަށީގެން ވާ ކަމަށް، މީޑިއާގައި ނަން ހާމަ ނުކުރުމަށް އެދި ވާހަކަދެއްކެވި، އެމެރިކާގެ އޮފިޝަލަކު ވަނީ ވިދާޅުވެފައެވެ.
އެމެރިކާގެ އަސްކަރިއްޔާއިން ބުނީ އަސްކަރީ ފައުޖުގެ އެތައް ހާސް މެމްބަރުންނަކަށް އަނބުރާ ގެއަށް ދިއުމުގެ އިންތިޒާމްތައް ހަމަޖައްސާފައި ވާ ކަމަށެވެ. އެގޮތުން ކުރިއަށް އޮތް 5-10 ދުވަހާ ދެމެދު، 15000 އެއްހާ ސިފައިން، ވޮޝިންގްޓަން ދޫކޮށް، އަމިއްލަ ވަޒަނަށް ބަދަލު ވާނެ ކަމަށް މައުލޫމާތު ލިބެއެވެ. މި މަހުގެ ނިޔަލަށް ވޮޝިންގްޓަންގައި މަޑު ކުރާނީ 7000 އެއްހާ ނޭޝަނަލް ގާޑުން ކަމަށް މައުލޫމާތު ލިބެއެވެ.
ކެޕޮޓޮލް ބިލްޑިންގްގައި ހިންގި ޖަރީމާއަށްފަހު ފޯރި މަރަމުންދިޔަ ނޭޝަނަލް ގާޑުން ވަނީ ދިގުދެމިގެންދިޔަ ޑިއުޓީ ޝިފްޓެއް އަދާ ކޮށްފައެވެ. ދޭތެރެއަކުން ހުސްވަގުތު ކޮޅެއް ދިން ނަމަވެސް، ގިނަ އަދަދެއްގެ ސިފައިންނަށް ނިދާ ހަދަން ޖެހުނީ ޕާކު ކުރުމަށް ހާއްސަކޮށްފައިވާ ތަންތަނުގައެވެ. ފާހާނާ ކުރުމުގެ އެކަށީގެންވާ ނިޒާމެއްވެސް އެތަންތަނުގައި ނުހުރެއެވެ. ބައެއް ސިފައިން ވަނީ، ގާނޫނު ހަދާ މަޖިލީހުގެ ތަޅުން މަތީގައިވެސް ނިދާފައެވެ.
ގާނޫނު ހަދާ މަޖިލީހުގެ މެމްބަރުން ވަނީ ފިންޏަކަށް ނުވަތަ އެހެންވެސް ގޮންޖެހުމަކަށް ބެލުމެއް ނެތި، ނޭޝަނަލް ގާޑުން އަދާކުރި ހިދުމަތް ފާހަގަ ކުރައްވާފައެވެ. ގާނޫނު ހަދާ މަޖިލީހުގެ ބައެއް މެމްބަރުން ވަނީ ހުކުރު ދުވަހުގެ ވަގުތެއްގައި ނޭޝަނަލް ގާޑުގެ ފައުޖުތަކާ ބައްދަލުކޮށް، މައާފަށް އެދިވަޑައިގެންފައެވެ.
އިންތިހާއަށް ދަށް ފެންވަރުގައި، ގަރާޖުތަކުގައި ނޭޝަނަލް ގާޑުން ނިދާ ހެދުމަށް އަމުރު ނެރުނީ ކާކުކަން ސާފު ނުވާ ކަމަށް ސެނެޓްގެ މެޖޯރިޓީ ލީޑަރު ޗަކް ޝޫމާ ވަނީ ވިދާޅުވެފައެވެ.
ބެލެވޭ ގޮތުގައި، ޖޯ ބައިޑަންގެ ވެރިކަމުގައި ނޭޝަނަލް ގާޑުންނަށް ހާއްސަ ސަމާލުކަމެއް ދެއްވާނެއެވެ. އެހެނީ، މި ދުނިޔެއާއި ވަކިވެފައިވާ ބައިޑަންގެ ދަރިފުޅު، ބޯ އަކީ ޑެލަވެއާ ނޭޝަނަލް ގާޑުންގެ ފައުޖުގައި ހިމެނުނު މެމްބަރެކެވެ.
އެމެރިކާގެ ނޭޝަނަލް ގާޑުންނަކީ، ގައުމީ އަސްކަރިއްޔާއާއި ވައިގެ އަސްކަރިއްޔާގެ ރިޒާވް ސިފައިންނެވެ. މީގެ ތެރެއިން ގިނަ މެމްބަރުންނަކީ، މަދަނީ ވަޒީފާތަކުގައިވެސް އުޅޭ މީހުންނެވެ.
