ކ. އަތޮޅުގެ ރިސޯޓެއް ކަމަށްވާ ގިލިލަންކަންފުށި ފަޅުގައި އޮންނަ ފިނޮޅެއްގައި ކޯރެއް ކެނޑި މައްސަލައެއް ފުލުހުންނާ ގުޅިގެން އެންވާރަމަންޓް ޕްރޮޓެކްޝަން އެޖެންސީން ބަލަން ފަށައިފިއެވެ.
އީޕީއޭއަށް މި މައްސަލަ ހުށަހަޅާފައި ވަނީ ފުލުހުންނެވެ. ފުލުހުން ބުނީ ހިންމަފުށި ކައިރީގައި އޮންނަ ވެލިގަނޑެއްގެ މެދުން ކޯރު ކަނޑަމުންދާ މައްސަލައެއް ހިންމަފުށީ ފުލުހުން ހުށަހެޅީ ރޭ 08:40 ހާއިރު ކަމަށެވެ. އަދި އެ ރިޕޯޓާއެކު ފުލުހުން އެ ސަރަހައްދަށް ގޮސް އެކަން ހުއްޓުވާފައިވާ ކަމަށްވެސް ފުލުހުން މައުލޫމާތު ދެއެވެ.
ފުލުހުން ބުނީ އެންވާރަމަންޓް ޕްރޮޓެކްޝަން އެޖެންސީ (އީޕީއޭ) އަށް އެކަން އަންގާފައި ވާނެ ކަމަށާއި މިހާރުން މިހާރަށް އަޅަންޖެހޭ ފިޔަވަޅުތަކަށް އީޕީއޭގެ ލަފާގެ މަތިން އަޅާފައި ވާނެ ކަމަށެވެ.
އެ މައްސަލަ ފުލުހުން ތަހުގީގު ކުރަމުން ދާއިރު، ފިނޮޅަށް ގެއްލުން ދީފައި ވަނީ ގިލިލަންކަންފުށި ރިސޯޓުގެ ޖެނެރަލް މެނޭޖަރު އިސްވެ ހުންނަވައި، އެ ރިސޯޓުގެ މުވައްޒަފުން ތަކެއް ކަމަށް މައުލޫމާތު ލިބެއެވެ. އަދި އެމީހުން އެކަން ކުރީ އެ ވެލިގަނޑަށް ބައެއް ރަށްރަށު މީހުން ދަތުރު ގޮސް ހަދާތީ ރިސޯޓަށް ޗުއްޓީ ހޭދަ ކުރަން ދާ ފަތުރުވެރިންނަށް އުނދަގުލާ ކުރިމަތިލާން ޖެހޭ ކަމަށް ބުނެއެވެ.
އެ ފިނޮޅުގައި ކޯރު ކަނޑާ ގެއްލުން ދީފައި ވަނީ ފަކީރާ ފަދަ ތަކެތި ބޭނުން ކޮށްގެންނެވެ. އެ ތަން ހަލާކު ކުރަމުންދާ ކަން ހިންމަފުށީގެ ބަޔަކަށް އެނގިގެން ރަށުން ބަޔަކު ގޮސް އެ މަންޒަރުތައް ވީޑިއޯކޮށް ސޯޝަލް މީޑިއާގައިވެސް ވަނީ އާންމު ކޮށްފައެވެ. އަދި އެކަމާ ގުޅިގެން ގިނަ ބައެއްގެ ފާޑުކިއުން ވަނީ ރިސޯޓުގެ ޖެނެރަލް މެނޭޖަރަށް އަމާޒުވެފައެވެ.
ފިނޮޅު ފަދަ ތަންތަނަށް އެއްވެސް ބަދަލެއް ގެނެވޭނީ އެކަމާ ގުޅޭ އެންވާރަަމަންޓަލް އެސެސްމަންޓްގެ އިންސްޕްކެޝަންތައް ހަދައި އީޕީއޭއިން އެކަމަށް ހުއްދަ ދިނުމުންނެވެ. އަދި ހުއްދަ ނެތި އެފަދަ ކަމެއް ކޮށްފިނަމަ ބޮޑު އަދަދަކުން ޖޫރިމަނާ ކުރުމުގެ ބާރު ކަމާބެހޭ އިދާރާތަކަށް ލިބިގެން ވެއެވެ.
މިކަމާ ގުޅިގެން އީޕީއޭއިން އަޅާ ފިޔަވަޅެއް އަދި ސާފުވެފައި ނުވާއިރު، ޓޫރިޒަމް މިނިސްޓްރީގެ ބަހެއް ހޯދުމަށް މަސައްކަތް ކުރި ނަމަވެސް ވަނީ ލިބޭގޮތް ނުވެފައެވެ.
