ޕްލާސްޓިކް ބޭނުންކުރުން ހުއްޓުވުމަށް ސްކޫލްތަކުގެ މެދުގައި ކުރިއަށް ގެންދާ 'އެއާ ޗެލެންޖް' ހަރަކާތް އިފްތިތާހް ކޮށްފިއެވެ.
އެޑިއުކޭޝަން މިނިސްޓްރީން ބުނީ، ޕްލާސްޓިކް ބޭނުންކުރުން ހުއްޓުވުމަށް ބާރުއެޅުމުގެ ގޮތުން ސްކޫލްތަކުގެ މެދުގައި ޗެލެންޖެއް ބޭއްވުމަށް ނިންމާފައިވާ ކަމަށާއި އެ ހަރަކާތް މިއަދު އިފްތިތާހް ކޮށްފައިވާ ކަމަށެވެ. އެގޮތުން މި ޗެލެންޗް ކުރިއަށް ގެންދިއުމަށް ހަމަޖެހިފައި ވަނީ މިނިސްޓްރީ އޮފް އެޑިއުކޭޝަނާއި ޕާލޭ މޯލްޑިވްސް ގުޅިގެން ކަމަށް އެޑިއުކޭޝަން އިން ބުނެއެވެ. އަދި ސްކޫލްތަކުގައި ކުރިއަށް ގެންދާ މި ޗެލެންޖަށް ދެވިފައިވާ ނަމަކީ 'އެއާ ޗެލެންޖް' ކަމަށް ވެސް އެޑިއުކޭޝަން އިން ބުނެއެވެ.
މި ޗެލެންޖްގެ ދަށުން ސްކޫލަތަކުން ފުރިހަމަ ކުރަން ޖެހޭ ހަރަކާތްތަކެއް ހިމެނޭ ކަމަށާއި އެ ހަރަކާތްތަކަށް ޕޮއިންޓް ދިނުމަށް ހަމަޖެހިފައިވާ ކަމަށް އެޑިއުކޭޝަނުން ބުނެއެވެ. ފުރިހަމަ ކުރަންޖެހޭ ހަރަކާތްތަކުގެ ތެރޭގައި ޕްލާސްޓިކު ބޭނުން ކުރުން ހުއްޓުމާއި، އުކާލާ ޕްލާސްޓިކު ވެއްޓަށް ދިޔަނުދީ ހިފެހެއްޓުމާއި، ދިރިއުޅުމުގެ ވައްޓަފާޅި އާއި އުފެއްދުންތެރި ކަމުގައި އާ ފަރުމާތަކަށް ބަދަލުވުމަށް އަމާޒުކޮށް ކަނޑައެޅިފައިވާ ހަރަކާތްތަކެއް ހިމެނޭ ކަމަށް އެޑިއުކޭޝަނުން ބުނެއެވެ.
އެއާ ޗެލެންޖުގައި ހިމެނެނީ 3 މަރުހަލާއެއް ކަމަށާއި ކޮންމެ މަރުހަލާއެއްގައި ކަނޑައެޅިފައިވާ ޕޮއިންޓް ސްކޫލްތަކުން ހާސިލްކުރުމުން، ޗެލެންޖްގެ އިނާމު ދިނުމަށް ހަމަޖެހިފައިވާ ކެޓެލޮގުން އެ ސްކޫލަކުން ހިޔާރު ކުރާ އިނާމުތަކެއް ލިބޭނެ ކަމަށް އެޑިއުކޭޝަނުން ބުނެއެވެ.
އެ ގޮތުން އެއާ ޗެލެންޖުގައި ހިމެނޭ 3 މަރުހަލާ ބަހާލާފައި ވަނީ އެ ސްކޫލަކަށް ލިބޭ ޕޮއިންޓް ތަކަށް ބަލާ ގޮތަށެވެ. އެ ގޮތުން ފުރަތަމަ މަރުހަލާ ހާސިލް ކުރެވެނީ 1025 ޕޮއިންޓް ލިބުމުންނެވެ. ދެވަނަ މަރުހަލާ ހާސިލް ކުރުމަށް 2050 ޕޮއިންޓް ހަމަ ކުރަންޖެހެއެވެ. އަދި ތިން ވަނަ މަރުހަލާ ހާސިލް ކުރުމަށް 5075 ޕޮއިންޓް ހަމަ ކުރަން ޖެހެއެވެ.
މި ހަރަކާތުގެ މަގުސަދަކީ، ޕްލާސްޓިކުގެ ބާވަތްތައް ވެށްޓަށް ދިޔަ ނުދީ ހިފެހެއްޓުން ކަމަށް އެޑިއުކޭޝަނުން ބުނެއެވެ. ހަމައެއާއެކު ޕްލާސްޓިކު ބޭނުންކުރުން ހުއްޓުމާއި، ދިރިއުޅުމުގެ ވައްޓަފާޅި އާއި އުފެއްދުންތެރިކަމުގައި ޕްލާސްޓިކާ ނުލައި އާ ފަރުމާތަކަށް ބަދަލުވުމުގެ މަސައްކަތް ކުރުމަށް ބާރުއަޅައި ހިތްވަރުދިނުން ކަމަށް އެޑިއުކޭޗަން މިނިސްޓްރީން ބުނެއެވެ.
