ށ. ކޮމަންޑޫ ހޯމް ކަރަންޓީނުގައި ހުރި ބިދޭސީއަކު ކޮވިޑް-19 އަށް ޕޮޒިޓިވް ވެއްޖެއެވެ.
'ދަ ޕްރެސް' އަށް މައުލޫމާތު ދެމުން އެރަށު ކައުންސިލުން ބުނީ ޕޮޒިޓިވް ވެފައި ވަނީ ފިރިހެނެއް ކަމަށެވެ. އަދި އެމީހާ ޕޮޒިޓިވް ވި ކަން އެނގިފައިވަނީ ހޯމް ކަރަންޓީނުގައި 10 ދުވަސް ފުރިހަމަ ކޮށް ނެގި ސާމްޕަލް އިން ކަމަށެވެ.
މިއީ ކޮމަންޑޫ އިން ޕޮޒިޓިވް ކޭހެއް ފެނުނު ދެ ވަނަ ފަހަރެވެ. މީގެ ކުރިން އެ ރަށުން ޕޮޒިޓިވް ވެފައި ވަނީ ހޯމަ ކަރަންޓީނުގައި ހުރި އަންހެނެކެވެ.
ރާއްޖެއިން މި ބައްޔަށް ޕޮޒިޓިވް ވި މީހުންގެ ޖުމްލަ އަދަދު މިވަނީ 14،583 އަށް އަރާފައެވެ. އަދި ބަލިން ރަނގަޅުވި ޖުމްލަ މީހުންގެ އަދަދު ވަނީ 13،566 އަށް އަރާފައެވެ.
ރާއްޖެއިން ކޮވިޑް ބަލީގައި ނިޔާވި މީހުންގެ އަދަދު 49 އަށް ވަނީ އަރާފައެވެ. އެއީ 42 ދިވެހިންނާއި ހަތް ބިދޭސީންނެވެ. އެ ބިދޭސީންގެ ތެރޭގައި ހިމެނެނީ ބަންގްލަދޭޝްގެ ހަ މީހަކާއި ފިލިޕީންސް މީހެކެވެ. ނިޔާވި 49 މީހުންގެ އިތުރުން ކޮވިޑަށް ޕޮޒިޓިވްވި 7 މީހަކު ނިޔާވެފައި ވެއެވެ. އަދި އެ 7 މީހުންނަކީ ކޮވިޑް މަރެއް ނޫން ކަމަށް އެޗްޕީއޭއިން ވަނީ ނިންމާފައެވެ.
މިވަގުތު ރާއްޖޭގެ ބައެއް ރަށްރަށް ވަނީ ކޮވިޑްގެ ސަބަބުން މޮނިޓަރިންގެ ހާލަތަށް ބަދަލު ކޮށްފައެވެ. އެ ރަށްރަށުގެ ތެރޭގައި ގއ. ދެއްވަދޫއާއި، ދާންދޫ އާއި ވިލިނގިލި ހިމެނެއެވެ.
