އަނިޔާވެރިކޮށް މަރާލާފައިވާ ޓެކްސީ ޑްރައިވަރު ގާސިމް ހަސަންގެ މަރުގެ މައްސަލާގައި ދައުވާ އުފުލާފައިވާ އަދުހަމް މުހައްމަދުގެ ޝަރީއަތުގެ އަޑުއެހުމެއް މިއަދަށް ތާވަލުކޮށްފިއެވެ.
ކްރިމިނަލް ކޯޓުގައި މި މައްސަލަ ތާވަލުކޮށްފައި ވަނީ ހެނދުނު 09:00 އަށެވެ. އަދުހަމްގެ މައްޗަށް ކޮށްފައި ވަނީ ތޫނުއެއްޗެއް ބޭނުން ކޮށްގެން ގަސްތުގައި މީހަކު މަރާލި ކަމުގެ ދައުވާއެވެ.
މިމައްސަލާގައި އެންމެ ފަހުން އަޑުއެހުމެށް ބާއްވަފައި ވަނީ އޮކްޓީބަރު 11، 2020 ގައެވެ. އެ އަޑުއެހުމުގައި މައްސަލަ ބައްލަވާ ގާޒީ، ވަކީލަކު އައްޔަނު ކުރުމަށް ދެއްވި މުއްދަތުގައި ވަކީލަކު އައްޔަނު ކުރައްވާފައި ނުވަނީ ކީއްވެތޯ ސުވާލު ކުރެއްވުމުން އަދުހަމު ބުނީ، ވަކީލަކު އައްޔަނު ކުރުމަށް ފޯމެއް ހުށައަޅައިގެންވެސް ޖަވާބެއް ނުލިބޭ ކަމަށެވެ.
އަދި އަދުހަމް ބުނީ އޭނާ "ކޮތަރުކޮއްޓެއް" ފަދަ ގޮޅިއެއްގައި ބަންދު ކޮށްފައި އޮންނައިރު، ކަރެކްޝަން އިން ފޯން ކޯލްގެ ފުރުސަތުތައް ނުދޭތީ ވަކީލަކު ހޯދަން މުއާމަލާތް ކުރަން ފުރުސަތު ނުލިބޭ ކަމަށެވެ.
ވަކީލަކު ހަމަޖައްސަން އިތުރު ފުރުސަތެއް ބޭނުންވޭތޯ ގާޒީ ސުވާލު ކުރެއްވުމުން އަދުހަމް ބުނީ ވަކީލަކު ހަމަޖެއްސިދާނެ ކަމަށް ގަބޫލު ނުކުރެވޭޭ ކަމަށާއި އެހެންކަމުން ވަކީލަކާ ނުލައި އަމިއްލައަށް ދިފާއުވާން ބޭނުންވާ ކަމަށެވެ. ނަމަވެސް ދައުވާއާ ގުޅޭ ހުރިހާ ލިއެކިއުންތައް ބޭނުންވާކަން އަދުހަމު ފާހަގަ ކުރިއެވެ.
ވަކީލަކު ބޭނުން ނުވާކަން އަދުހަމު ފާހަގަ ކުރުމާއެކު މައްސަލަ ބައްލަވާ ގާޒީ ވަނީ ވަކީލަކާ ނުލައި މައްސަލަ ކުރިއަށް ގެންގޮސް، ދިފާއީ ވަކީލު އަތުގައި ހުރި ލިއެކިއުންތައް ފޯރުކޮށްދިނުމުގެ އިންތިޒާމު ހަމަޖައްސައި ދެއްވުމަށް އެދިވަޑައިގެންފައެވެ. އެ ލިއެކިއުންތައް ކަރެކްޝަންސް މެދުވެރިކޮށް ހަވާލު ކުރައްވާނެކަން ދައުލަތުން ފާހަގަކުރިއެވެ.
ނަމަވެސް އެ މައްސަލައިގައި ދައުލަތުގެ ފަރާތުން އާ ވަކީލަކު ހަމަޖެއްސުމަށާއި ވަކީލު މުއާމަލާތް ކުރުމަށް ދައުލަތަށް ޝަރީއަތުން އެންގޭނެ ކަމާއި ވަކީލާ މުއާމަލާތް ކުރުމުގެ ފުރުސަތާއި ވަކީލް ފޯމު ހުށަހެޅުމުގެ އިންތިޒާމުތައް ހަމަޖައްސަން އަމުރު ނެރެވިދާނެ ކަން ގާޒީ ފާހަގަ ކުރެއްވުމުން އަދުހަމް ބުނީ އެ ފުރުސަތުތައް ލިބޭނަމަ ވަކީލަކާ އެކު ކުރިއަށް ދާން ބޭނުންވާ ކަމަށެވެ.
އަނިޔާވެރިގޮތަކަށް އދ މާމިގިލި/ ކަނީރުމާގެ 59 އަހަރުގެ ގާސިމް ހަސަން ކަރަށް ވަޅި ހަރައި މަރާލާފައި އޮއްވާ ފެނުނީ ހުޅުމާލެ ސެންޓްރަލް ޕާކް އުތުރުން އޮންނަ ރީތިގަސް މަގުން ޑިސެމްބަރު 4 2019 ގައެވެ. މި މައްސަލާގައި ގާސިމް މަރާލުމަށް އަދުހަމް ވަނީ ފުރަތަމަ އިއުތިރާފް ވެފައެވެ.
ގާސިމަށް ވަޅިން ބިރު ދައްކާ އޭނާގެ އަތުން ފައިސާ ފޭރިގަތުމަށް އަދުހަމް މަސައްކަތް ކޮށްފައި ވާއިރު، އޭނާއަށް އެކަން ކާމިޔާބުވެފައި ނުވަނީ، ގާސިމް އަމިއްލަ ދިފާއުގައި އަދުހަމް އަތުން ވަޅި އަތުލުމަށް މަސައްކަތް ކުރުމުންނެވެ. އަދި ގާސިމަށް ވަޅިން ހަމަލާދީފައި ވަނީ ގާސިމްގެ ހަޅޭކުގެ އަޑު ކަނޑުވާލުމުގެ ބޭނުމުގައި ކަމަށް އަދުހަމް ފުލުހުންނަށް ދީފައިވާ އިއުތިރާފުން އެނގެއެވެ. ގާސިމްގެ ކާރަށް އަދުހަމް އެރީ ފޭރުމަށް ކަމުގައި ވިޔަސް، ގާސިމަށް ވަޅިން ހަމަލާ ދިނުމަށް ފަހު، އެ ކުރެވުނީ މާ ބޮޑު ކުށެއް ކަން އިހުސާސްވެ، އިތުރަށް ފޭރެން މަސައްކަތް ނުކޮށް، އަދުހަމް ވަނީ އެ ސަރަހައްދުން ފިލާފައެވެ.
ނަމަވެސް މައްސަލަ ކޯޓާ ހަމައަށް ގޮސް، ޝަރީއަތުގައި އަދުހަމް ވަނީ ގާސިމް މަރާލި ކަމަށް އިންކާރުކޮށްފައެވެ. އަދުހަމް ބުނެފައި ވަނީ ކުރިން އޭނާ ދައުވާއަށް އިއުތިރާފުވީ މަސްތުގެ ހާލަތުގައި ހުރެ ކަމަށެވެ. އަދި އޭނާ ކޯޓަށް ހާޒިރުކުރަނީ ފުލުހުން އޭނާއަށް މަސްތުވާ އެއްޗެހި ދީގެން މަސްތުގެ ހާލަތުގައި ބަހައްޓައިގެން ކަމަށް އޭނާ ވަނީ ބުނެފައެވެ.
ފުލުހުން ވަނީ ގާސިމް މަރާލާފައި އޮއްވާ ފެނުނު ސަރަހައްދުން ފިންގާޕްރިންޓާއި ޑީއެންއޭ ފަދަ ފޮރެންސިކް ހެކި އަދި އޭނާ މަރާލަން ބޭނުންކުރި ހަތިޔާރުވެސް އޭނާ މަރާލާފައި އޮއްވާ ފެނުނު ތަނުގެ 300 އެއްހާ މީޓަރު ދުރުން މަގު ކައިރީ ހުރި ގަސްތަކުގެ ތެރެއިން ހޯދާފައެވެ. އަދި ފުލުހުން ވަނީ ސީސީޓީވީ ފުޓޭޖުތައް އެނެލައިޒްކޮށް، ގާސިމް ދުއްވި ޓެކްސީ ދަތުރު ކޮށްފައިވާ މަގުތައް ވެސް ދެނެގެންފައެވެ.
