ދެ ގާޒީއެއްގެ ސުލޫކީ މައްސަލަ ތަހުގީގު ކުރުމަށް ޖުޑިޝަލް ސާވިސް ކޮމިޝަން (ޖޭއެސްސީ)އިން ތަހުގީގު ކޮމިޓީ އެއް އެކުލަވާލައިފިއެވެ.
ޖޭއެސްސީން ބުނީ ސުލޫކީ މައްސަލަ ބެލުމަށް މިތަހުގީގު ކޮމިޓީ އެކުލަވާލާފައިވަނީ އިއްޔެ ބޭއްވި އެ ކޮމިޝަންގެ ބައްދަލުވުމުގައި ކަމަށެވެ.
އެ ކޮމެޓީން ބަލަނީ ސިވިލް ކޯޓުގެ ގާޒީ މަރްޔަމް ވަހީދުގެ މައްސަލައަކާއި ކްރިމިނަލް ކޯޓުގެ ގާޒީ މުހައްމަދު ސަމީރުގެ މައްސަލައެކެވެ.
ސިވިލް ކޯޓުގެ ގާޒީ މަރްޔަމް ވަހީދުގެ މައްސަލަ ބަލަނީ ސިވިލް ކޯޓުގައި ކުރިއަށް ދިޔަ ތަންފީޒު ގަޟިއްޔާއެއްގައި ހިމެނޭ މަޞްމަކާ އެގަޟިއްޔާއާ ގުޅޭގޮތުން ޝަރީއަތުގެ ބޭރުން މުއާމަލާތުކޮށް، ހުކުމް ތަންފީޒު މައްސަލަތައް ބެލުމުގައި އަމަލުކުރާ އުސޫލުތަކާ ކަނޑައެޅިގެން ހިލާފަށް އަމަލުކޮށްފައިވާ ކަމަށް ބުނާ މައްސަލައެއްގައި ކަމަށް ޖޭއެސްސީން ބުނެއެވެ.
ޖޭއެސްސީން ބުނީ ކްރިމިނަލް ކޯޓުގެ ގާޒީ ސަމީރުގެ މައްސަލަ ބަލަނީ ކްރިމިނަލް ކޯޓުގެ ޝަރީއަތުގެ އަޑުއެހުމެއްގައި ގާނޫނީ ގޮތުން ދައްކަން ބޭނުންވާ ވާހަކަ ދެއްކުމުގެ އެކަށީގެންވާ ފުރުސަތު ދައުވާލިބޭ ފަރާތުގެ ގާނޫނީ ވަކީލުންނަށް ނުލިބޭފަދަ ގޮތަކަށް އަމަލުކުރައްވާ، ޝަރީއަތުގެ އަޑުއެހުން ކުރިއަށް ގެންދިއުމުގައި އެކަށީގެންނުވާ ގޮތަށް އަމަލުތައް ބެހެއްޓި ކަމަށް ބުނާ މައްސަލައެއްގަ ކަމަށެެވެ.
އޭގެ އިތުރުން މި ގަޟިއްޔާގެ އެހެން އަޑުއެހުމެއްގައި ދައުވާލިބޭ ފަރާތުގެ ގާނޫނީ ވަކީލުން ކުށްވެރިކުރާފަދަ ގޮތަކަށް ވާހަކަދައްކާ އަދި އެ ވަކީލުންނާ މެދު ތަޢައްޞުބެއް އޮތްކަން ހާމަވާފަދަ ގޮތަކަށް ގާޒީ ސަމީރު އަމަލު ކޮށްފައިވާ ކަމަށް ބުނާ މައްސަލަ އެއް ވެސް ހިމެނޭ ކަމަށް ޖެއެސްސީން ބުނެއެވެ.
