ނުކުޅެދުންތެރިކަަން ހުންނަ މީހަކަށް ޖިންސީ ގޯނާ ކުރި ކަމަށް ބުނާ މައްސަލައެއް ކްރިމިނަލް ކޯޓާއި ހައިކޯޓުން ބޭރު ކޮށްލުމުން އެ މައްސަލަ ސުޕްރީމް ކޯޓަށް ހުށަހަޅައިފިއެވެ.
މި މައްސަލަ ކްރިމިނަލް ކޯޓާއި ހައި ކޯޓުން ބޭރުކޮށްލާފައި ވަނީ މި މައްސަލާގައި އަނިޔާ ލިބުނު މީހަކީ ނުކުޅުދުންތެރިކަން ހުންނަ މީހެއްކަން އަންގައިދޭ ލިޔުމެއް ދައުލަތުން ހުށަހަޅާފައި ނުވާތީއެވެ. މިފަދަ މައްސަލަތަކުގައި އަނިޔާ ލިބޭ މީހާއަކީ އުމުރުން 18 އަހަރު ފުރިފައިވާ މީހެއް ނަމަ ނުކުޅެދުންތެރިކަން ހުންނަ މީހެއްކަން އަންގައިދޭ ލިޔުމެއް ހުށަހަޅަން ޖެހެއެވެ.
ބުއްދީގެ ތަސައްރަފު ނުފެދޭ މީހުންނަށް ޖިންސީ ގޯނާ ކުރުމަކީ ކުޑަކުދިންނަށް ޖިންސީ ގޯނާ ކުރުން ކަމަށް ކުޑަކުދިންނަށް ޖިންސީ ގޯނާކުރާ މީހުންނާ މެދު ހާއްސަ އުސޫލުތަކަށް އަމަލު ކުރުމުގެ ގާނޫނުގައި ބުނެއެވެ. ނަމަވެސް މި މައްސަލަ އެ ގާނޫނުގެ ދަށުން ނުބެލޭނެ ކަމަށް ކްރިމިނަލް ކޯޓުން ނިންމީ، އެ ގާނޫނުގައި ބުނާފަދަ، ބުއްދީގެ ތަސައްރަފު ނުފެދޭ މީހެއްކަން ސާބިތުވާ ފަދަ ސަރުކާރު ގަބޫލުކުރާ ލިޔުމެއް ހުށަހަޅާފައި ނުވާތީއެވެ.
ކްރިމިނަލް ކޯޓުން އެ މައްސަލަ ބޭރު ކޮށްލުމުން ދައުލަތުން ވަނީ އެ ނިންމުން ހައިކޯޓްގައި އިސްތިއުނާފު ކޮށްފައެވެ. ނަމަވެސް ހައި ކޯޓުން ވެސް ވަނީ ކްރިމިނަލް ކޯޓުގެ ނިންމުމަށް ތާއިދުކޮށްފައެވެ. އެ މައްސަލަ މިހާރު ވަނީ ސުޕްރީމް ކޯޓަށް ހުށަހަޅާފައެވެ.
މިކަމާ ގުޅިގެން ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވީ، މި މައްސަލަ ސުްޕރީމް ކޯޓަށް ހުށަހެޅީ، ހައިކޯޓުން މައްސަލަ ނިންމި ގޮތާމެދު ހިތްހަމަ ޖެހި ވަޑާއި ނުގަންނަވާތީ ކަމަށެވެ. އަދި ދައުލަތުން ހުށަހެޅި ލިޔުމާބެހޭ ސުވާލެެއް، ދެބަސްވުމެއް އޮތް ކަމަށާއި، އެކަމަށް ނިޒާމުގެ ތެރެއިން ހައްލު ހޯދޭނެ ކަމަށް އޭނާ ވިދާޅުވިއެވެ. ޝަމީމް ވިދާޅުވީ ސާބިތުކަމާއެކު، ގޮތްދޫނުކޮށް އިންސާފު ގާއިމު ކުރުމުގައި ކުރިއަށް ވަޑައިގަންނަވާނެ ކަމަށެވެ.
