މާލޭގައި ބޭއްވި ކާވެނި ހަފްލާއަކުން ޕޮޒިޓިވްވި މީހުންނާ ގުޅުން ހުރި، ޔޫކޭއިން ރާއްޖެ އައި މީހަކު ކޮވިޑަށް ޕޮޒިޓިވް ވެއްޖެއެވެ. އޭނާ ޕޮޒިޓިވް ވީ ކައިވެނި ހަފްލާގެ ފަހުން ނަމަވެސް އޭނާ އަކީ އެ ކްލަސްޓާއާ ގުޅުން ހުރި މީހެއް ކަމަށް ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފިއެވެ.
އެޗްއީއޯސީން ބުނީ ޔޫކޭން އައި މީހާ ކޮވިޑަށް ކޮވިޑަށް ޕޮޒިޓިވް ވެފައިވާ ކަމަށާއި އެމީހާ އަކީ ކައިވެނި ކްލާސްޓާއާ ގުޅުންހުރި އާއިލާއެއްގެ މެންބަރެއް ކަމަށެވެ.
އެޗްއޯސީން ބުނީ އޭރު ގަވައިދު އޮތް ގޮތުން ޔޫކޭ އިން އަންނަ މީހުން ކަރަންޓީނު ވާން ނުޖެހޭ ކަމަށެވެ. ނަމަވެސް އެމީހާގެ ކިބައިން ބަލީގެ އަލާމަތްތައް ފެނި ޓެސްޓު ކޮށްފައިވާ ކަމަށެވެ. ނަމަވެސް އެއީ ޔޫކޭން ފެނުނު ކޮވިޑުގެ ސްޓެރެއިންގެ ކޭސްއެއް ކަމެއް އަދި ބެލޭނެ ގޮތެއް ނެތް ކަމަށް އެޗްއޯސީން ބުނެއެވެ.
ޝީ ބިލްޑިންގައި ބޭއްވި ކާވެނި ހަފްލާއަކުން 41 މީހަކު ޕޮޒިޓިވް ވެފައިވާ ކަމަށް ރޭ އެޗްއީއޯސީން ވަނީ ބުނެފައެވެ.
ގާތްގަނޑަކަށް 120 މީހުން ބައިވެރިވި އެ ކާވެނި ހަފްލާފައި ބައިވެރިވި މީހުންގެ ކޮންޓެކްޓް ޓްރޭސިންއަށް މިހާތަނަށް 116 މީހަކު ފާހަގަ ވެފައިވާ ކަމަށް އެޗްއީއޯސީން ބުނެފައެވެ. އަދި ކޮވިޑްގެ އަލާމާތްތައް ހުރި ބަޔަކު އެ ހަފްލާގައި ބައިވެރިވެފައި ވާއިރު، ޕޮޒިޓިވްވި މީހުންގެ ތެރޭގައި ހައި ރިސްކު ކެޓަގަރީގައި ހިމެނޭ 4 މީހުން ހިމެނޭ ކަމަށް ވެސް އެޗްއީއޯސީން ބުނެއެވެ.
މި ހަފްލާއަށް ދިޔަ ފަރާތްތަކުގެ ތެރެއިން އެޗްއީއޯސީން ނުގުޅާ ފަރާތްތަކުން 1676 އަށް ގުޅާ ވިހާވެސް ގިނަ މައުލޫމާތު ހިއްސާ ކުރުމަކީ މުހިންމު ކަމެއް ކަމަށް އެ ސެންޓަރުން ބުނެއެވެ. އަދި އެ ސެންޓަރުން ގުޅިފައި ނުވި ނަމަވެސް ގެއިން ބޭރަށް ނުނިކުމެ ގޭގައި އެކަހެރިވެ ތިބުމަށް އެޗްއީއޯސީން ވަނީ އެފަރާތްތަކަށް އިލްތިމާސް ކޮށްފައެވެ.
