ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19)ގެ ޝިކާރައަކަށްވެ، އެމެރިކާއިން އެއް ދުވަހާ މަރުވި މީހުންގެ އަދަދު 3000 އަށް ވުރެ މައްޗަށް އަރައިފިއެވެ.
ލިބިފައިވާ ތަފާސް ހިސާބުތަކަށް ބަލާއިރު، ބުދަ ދުވަހު 3243 މީހަކު، ކޮވިޑް-19ގެ ބަލިމަޑުކަމުގައި އެމެރިކާއިން މަރުވި ކަމަށް ވަނީ ރެކޯޑް ކޮށްފައެވެ. މިއީ ކޮވިޑް-19ގެ ބަލިމަޑުކަން ފެށުނު ފަހުން، 24 ގަޑިއިރުގެ ތެރޭގައި މިހާ ގިނަ އަދަދެއްގެ ބަޔަކު މަރުވެގެން ރެކޯޑް ކުރި ފުރަތަމަ ފަހަރެވެ.
ކޮވިޑް-19 ޖެހިގެން އެމެރިކާއިން މަރުވި މީހުންގެ ޖުމުލަ އަދަދު ވަނީ 296698 އަށް އަރާފައެވެ. މިއީ ދުނިޔޭގެ ނިސްބަތުން ބަލާއިރުވެސް ރެކޯޑް އަދަދެކެވެ.
ކަން މިހެން އޮތްއިރު އެމެރިކާއިން ކޮވިޑް-19އަށް ޕޮޒިޓިވްވި މީހުންގެ އަދަދު ވަނީ 15.8 މިލިއަނަށް ވުރެ މައްޗަށް އަރާފައެވެ. މިއީވެސް ރެކޯޑެކެވެ. އެމެރިކާއާއި އެންމެ ގާތުން ކޭސްތައް ރިޕޯޓް ކުރާ އިންޑިއާއިންވެސް މިހާތަނަށް ރެކޯޑް ކޮށްފައިވަނީ 9.67 މިލިއަން ކޭހެވެ.
މި ފަހަކަށް އައިސް އެމެރިކާއިން ދުވާލެއްގެ މައްޗަށް އެވަރޭޖު ކޮށް 2200 މީހުން ކޮވިޑް-19ގައި މަރުވެއެވެ. އަދި އެވަރޭޖުކޮށް ދުވާލަކު 200000 އާ ކޭސް ރެކޯޑް ކުރެއެވެ. މި ދުވަސްވަރަކީ އެމެރިކާގައި ގައިރު ދީނުގެ އެކި ހަރަކާތްތަކާ، އެޒާތުގެ އެކި އިވެންޓްތައް އޮތް ދުވަސްވަރެއް ކަމުން، ބަލީގެ ކޭސް ނަމްބަރު އަދިވެސް އިތުރަށް މައްޗަށް ދާނެ ކަމަށް ކަމާ ބެހޭ ފަރާތްތަކުން ލަފާކުރެއެވެ.
ކޮވިޑް-19އިން ދިފާއުވުމަށް ފައިޒާއާއި ބައޮއެންޓެކުން ތަރައްގީ ކޮށްފައި ވާ ވެކްސިން، އާންމު އުސޫލުން ބޭނުން ކުރުމާ މެދު ގޮތެއް ނިންމުމަށް ފުޑް އެންޑް ޑްރަގް އެޑްމިނިސްޓްރޭޝަންގެ ލަފާދާރުންގެ ޕެނަލުން ބުރާސްފަތި ދުވަހުގެ ވަގުތެއްގައި މަޝްވަރާ ކުރާނެއެވެ. އެ ޕަނަލުން ނިންމާ ގޮތަކުން، ވަގުތުން ވަގުތަށްވެސް ވެކްސިން ދިނުމުގެ މަސައްކަތް އެމެރިކާގައި ފެށުން އެކަށީގެންވެއެވެ.
އިނގިރޭސިވިލާތުން މިހާރު ވަނީ މި މަޝްރޫ ފަށާ، އެތައް ހާސް ބަޔަކަށް ވެކްސިން ދީފައެވެ.
ކަން މިހެން އޮތް އިރު، އެމެރިކާގެ އިންތިހާބީ ރައީސް، ޖޯ ބައިޑަން ވަނީ ވެރިކަމުގެ ފުރަތަ 100 ދުވަހުގެ ތެރޭގައި 100 މިލިއަން ވެކްސިން ޑޯޒް ދިނުމަށް އަމާޒު ހިއްޕަވާ، އެކަން އިއުލާން ކުރައްވާފައެވެ. އަދި ފުރަތަމަ 100 ދުވަހު، ހުރިހާ ރައްޔިތުން މާސްކު ބޭނުން ކުރުމަށްވެސް ބައިޑަން ވަނީ އިލްތިމާސް ކުރައްވާފައެވެ.
