މޯލްޑިވްސް މީޑިއާ ކައުންސިލް (އެމްއެމްސީ) އިން ދޭ ނޫސްވެރިކަމުގެ 2019 ވަނަ އަހަރުގެ އިނާމު 10 ނޫސްވެރިޔަކަށް ލިބިއްޖެއެވެ.
މި އަހަރުގެ ނޫސްވެރިކަމުގެ އިނާމަށް 11 ދާއިރާއަށް 80 ފަރާތަކުން ނަން ހުށަހަޅާފައިވާ ކަމަށް އެމްއެމްސީއިން ބުނެއެވެ. އަދި މި އަހަރުގެ ނޫސްވެރިކަމުގެ އިނާމު 11 ދާއިރާއަކުން 10 ނޫސްވެރިއަކަށް ލިބިފައިވާ ކަމަށް އެމްއެމްސީން ވަނީ ބުނެފައެވެ.
ނޫސްވެރިކަމުގެ އިނާމު ހާސިލްކޮށްފައިވާ ނޫސްވެރިންގެ ތެރޭގައި
- ތަހުގީގީ ނޫސްވެރިކަން: މުހައްމަދު މުޒައްޔިން ނާޒިމް / ސަން އޮންލައިން
- އިޖުތިމާއީ، ތާރީހާއި ސަގާފަތް، ފަންނުވެރިކަން: ޝަފްނާ ހުސެއިން / ސަން އޮންލައިން
- ސިޔާސީ ދާއިރާ: މުޙައްމަދު ވިޝާމް / އަވަސް އޮންލައިން
- ޝަރުއީ އަދި ގާނޫނީ ދާއިރާ: މުއިއްޒު އިބްރާހީމް / މިހާރު ނޫސް
- ތިމާވެއްޓާއި ދެމެހެއްޓެނިވި ތަރައްގީ: އީމާން އަންވަރު / އަވަސް އޮންލައިން
- ފީޗާ ރިޕޯޓް: މުހައްމަދު ހަމްދޫން / މިހާރު ނޫސް
- ވިޔަފާރި އާއި އިގުތިސޯދުގެ ދާއިރާ: މުހައްމަދު އަފްރާހު / އަވަސް އޮންލައިން
- ވިޔަފާރި އާއި އިގުތިސޯދުގެ ބްރޯޑްކާސްޓިން ދާއިރާ: ސިމާހާ ނަސީމް / ރާއްޖެ ޓީވީ
- ކުޅިވަރުގެ ދާއިރާ: މުހައްމަދު ހަމްދޫން / މިހާރު ނޫސް
- ފީޗާ ރިޕޯޓް ބްރޯޑްކާސްޓިން ދާއިރާ: ޝުރުފާ މުހައްމަދު / ވީޓީ
- ވީ ފޮޓޯ ޖާނަލިޒަމް: ނިޝާން އަލީ / މިހާރު ނޫސް
- ވީޑިއޯ ޖަނަލިޒަމް: ޝުރުފާ މުހައްމަދު / ވީޓީވީ
- އެންމެ އުއްމީދީ ނޫސްވެރިޔާ: މުހައްމަދު މުޒައްޔިން ނާޒިމް / ސަން އޮންލައިން
ރޭ ވަނީ ގެއްލުވާލާފައިވާ ނޫސްވެރިޔާ އަހްމަދު ރިލްވާންގެ ހަނދާނުގައި ހާއްސަ ފިލައެއް ވެސް އާއިލާއަށް އަރުވާފައެވެ. އެ ފިލާ ރިލްވާންގެ ދައްތަ ފާތުމަތު ޝެހެނާޒާ ހަވާލުކޮށް ދެއްވީ އެމްއެމްސީގެ ރައީސް ރަައީސް ހިދާޔަތުﷲއެވެ.
ރޭގެ ރަސްމިއްޔާތަށް ފޮނުއްވި ވީޑިއޯ މެެސެޖެއްގައި ރައީސް އިބްރާހިމް މުހައްމަދު ސޯލިހް ވަނީ އިޖުތިމާއީ ބޮޑެތި މައްސަލަތައް ކަމުގައިވާ މަސްތުވާތަކެތީގެ މައްސަލައާއި ހަރުކަށި ފިކުރުގެ މައްސަލައަކީ ވެސް އެ މައްސަލަތައް ހައްލު ކުރުމުގައި ނޫސްވެރިންގެ ދައުރު މިހާރަށް ވުރެ ފުޅާ ކުރަން ޖެހޭ ދެ ދާއިރާކަން ފާހަގަކުރައްވާފައެވެ. ހަމައެހެންމެ ކޯވިޑް-19އާ ގުޅިގެން އިގްތިސާދަށް ލިބުނު ގެއްލުން ތަކުން އަރައިގަނެ އިގްތިސާދު އަލުން އާރާސްތު ކުރުމުގައި ވެސް ނޫސްވެރިން ފުޅާ ދައުރެއް އަދާކުރުމަށް ރައީސް އެދިވަޑައިގަތެވެ.
ރައީސް ވަނީ މީގެ ދެ އަހަރު ކުރިން ރާއްޖޭގައި ނޫސްވެރިކަމުގެ ދާއިރާ އޮތް ހާލަތުގެ މައްޗަށް ވެސް އަލިއަޅުއްވާލައްވާފައެވެ.
އެގޮތުން މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަނުން އެއިރު މަސައްކަތް ކުރަމުން ގޮސްފައި ވަނީ ނޫސްވެރިންނާއި ނޫސް އިދާރާތައް ކުށްވެރިކޮށް ފިޔަވަޅު އެޅުމުގައި ކަން ރައީސް ފާހަގަ ކުރެއްވިއެވެ. ނަމަވެސް މިހާރު އެ ސަގާފަތް މުޅިން ބަދަލު ކުރައްވާފައި ވާނެ ކަމުގައި ރައީސް ވިދާޅުވިއެވެ.
މެސެޖު ނިންމަވާލެއްވުމުގެ ކުރިން ރައީސް ވަނީ ގެއްލުވާލާފައިވާ ނޫސްވެރިޔާ އަހުމަދު ރިޟްވާނާއި، އަނިޔާވެރި ގޮތަކަށް މަރައިލާފައިވާ ޔާމީން ރަޝީދުގެ ހަނދާންތައް އާ ކުރައްވާ އެ ދެ ނޫސްވެރިންނަށް އިންސާފު ހޯދައިދިނުމަށް ސަރުކާރުން ކުރަމުން ދާ މަސައްކަތްތައް ހުއްޓުމެއްނެތި ކުރިއަށް ދާކަމުގައި ވިދާޅުވެފައެވެ.
ނޫސްވެރިކަމުގެ އިނާމު ހާސިލް ކުރި ހުރިހާ ނޫސްވެރިންނަށް "ދަ ޕްރެސް" ގެ ފަރާތުން މަރުހަބާ ކިޔަމެވެ.
