ސިންގަޕޫރުގައި މާބަނޑު އަންހެނަކު ވިހޭ ދަރިފުޅުގެ ހަށިގަނޑުގައި، ކޮރޯނާވައިރަސް ޑިޒީޒް (ކޮވިޑް-19) އެންޓިބޮޑިޒް ހުރިކަން ކަށަވަރު،ވެ މާބަނޑު ދުވަސްވަރު މި ބައްޔަށް ޕޮޒިޓިވްވުމުން ދަރިފުޅަށް ވައިރަހުގެ އަސަރު ކޮށްފާނެ ކަމާ މެދު ކުރަމުންދާ ދިރާސާއަށް އާ އަލިކަމެއް ގެނުވައިފިއެވެ.
ސެލީން ނަންގް-ޗާން ނަމަކަށް ކިއާ މި އަންހެން މީހާއަކީ މާޗް މަހު ކޮވިޑް-19 އަށް ޕޮޒިޓިވްވީ މީހެކެވެ. މި އަންހެން މީހާ ވިހާފައި ވަނީ މި ނޮވެމްބަރު މަހުއެވެ. އޭނާ ވިހޭ ދަރިފުޅުގެ ހަށިގަނޑުގައި ކޮވިޑް-19 އެންޓިބޮޑީޒް ހުރިކަން ވަނީ ކަށަވަރު ވެފައެވެ.
"ޑޮކްޓަރު ލަފާ ކުރާ ގޮތުގައި، ދަރިފުޅުގެ ހަށިގަނޑަށް ފޯރާފައި ވަނީ، އަހަރެންގެ ހަށިގަނޑުގައި އުފެދުނު އެންޓިބޮޑީޒް" ސެލީން ބުންޏެވެ.
ކޮވިޑް-19އަށް ޕޮޒިޓިވްވެ، ސެލީންގެ ހަށިގަނޑަށް، ބަލީގެ މާ ބޮޑު އަސަރެއް ނުކުރެއެވެ. ދެ ހަފުތާ ބައިގެ މުއްދަތެއް ހޮސްޕިޓަލުގައި ހޭދަ ކުރުމަށްފަހު ޑިސްޗާޖު ކޮށްލިއެވެ.
ދުނިޔޭގެ ސިއްހަތު ޖަމިއްޔާ (ޑަބްލިއެޗްއޯ) އިން ބުނެފައި ވާ ގޮތުގައި، މާބަނޑު ދުވަސްވަރު ކޮވިޑް-19 ޖެހުމުން، ދަރިފުޅަށް ވައިރަހުގެ އަސަރު ކުރާ ކަން ނުވަތަ ނޫންކަން އަދި ކަށަވަރެއް ނުވެއެވެ.
އަދާ ޖެހުނުއިރުވެސް، ބަނޑު ތެރޭގައި ދަރިފުޅު އޮންނަ ފެންދުލިންނާއި، މައިމީހާގެ ގާތުން އަންނަ ކިރުންވެސް ކޮވިޑް-19ގެ އަސަރެއް ނުފެނެއެވެ.
އެމާޖިންގް އިންފެކްޝަސް ޑިޒީޒަސް ޖާނަލްގައި ޗައިނާއިން ރިޕޯޓް ކޮށްފައި ވާ ގޮތުގައި، މާ ބަނޑު ދުވަސްވަރު ކޮވިޑް-19 ޖެހޭ މީހުން ވިހާ ކުދިންގެ ހަށިގަނޑުން އެންޓިބޮޑީޒް ފެނެއެވެ. ނަމަވެސް ދުވަސް ވާ ވަރަކަށް އެންޓިބޮޑީޒްގެ މިންވަރު ދަށް ވާކަމަށްވެސް އެ ލިޔުމުގައި ވެއެވެ.
އަލަށް އުފަންވާ ތުއްތު ކުއްޖާއަށް، މައިމީހާގެ ފަރާތުން ކޮވިޑް-19 ފޯރުމަށް އޮންނަނީ ހަނި ފުރުސަތެއް ކަމަށް، ޖާމާ ޕީޑިއަޓްރިކްސްގައި އޮކްޓަބަރު މަހު އާންމު ކުރި ލިޔުމެއްގައި ބުނެފައި ވެއެވެ.
ކޮވިޑް-19 އެންޓިބޮޑީޒްއަކީ، ކޮވިޑް-19 އާ ދެކޮޅަށް، ހަށިގަނޑުގެ ދިފާއީ ނިޒާމުގައި އުފައްދަ މާއްދާއެވެ.
