މޯލްޑިވްސް މީޑިއާ ކައުންސިލް (އެމްއެމްސީ) ގެ އިންތިހާބަށް އޮބްޒާވަރުން ރަޖިސްޓްރީވުމަށް ހުޅުވާލައިފިއެވެ.
ހޯމް މިނިސްޓްރީން ބުނީ މީޑިއާ ކައުންސިލްގެ މި ދައުރު ހަމަވާތީ އެ ކައުންސިލަށް އަލުން މެންބަރުން އިންތިހާބު ކުރުމަށް ބާއްވާ ވޯޓުގައި އޮބްޒާވަރުންގެ ގޮތުގައި ރަޖިސްޓްރީކުރުމަށް ހުޅުވާލާފައިވާ ކަމަށެވެ.
ރަޖިސްޓްރީކުރުމަށް ހުށަހަޅާ ފޯމު މިނިސްޓްރީގެ ވެބްސައިޓުން ޑައުންލޯޑް ކުރެވޭނެ ކަމަށް ހޯމް މިނިސްޓްރީން ބުނެއެވެ.
މިނިސްޓްރީން ބުނީ ފޯމު ބަލައިގަންނާނީ މާދަމާ މެންދުރު 13:30 ގެ ކުރިން މިނިސްޓްރީ އޮފް ހޯމްއެފެއާޒް (ވެލާނާގޭ 10 ވަނަ ފަންގިފިލާ) އިން ކަމަށެވެ.
އޮބްޒާވަރުންގެ ގޮތުގައި ހަރަކާތްތެރިވެވޭނީ ކޮންމެ ކެންޑިޑޭޓެއް ނުވަތަ އިދާރާއެއް ނުވަތަ ޖަމްއިއްޔާ، ޖަމާއަތެއް ތަމްސީލުކުރާ އެއް ފަރާތެއް ކަމަށް މިނިސްޓްރީން ވަނީ ބުނެފައެވެ.
މީޑިއާ ކައުންސިލް ގެ އިންތިހާބު ބޭއްވުމަށް ހަމަޖެހިފައިވަނީ އަންނަ މަހުގެ 5 ވަނަ ދުވަހުއެވެ.
މިފަހަރުގެ އިންތިހާބުގައި މޯލްޑިވްސް މީޑިއާ ކައުންސިލްގެ މީޑިއާގެ މެންބަރުކަމަށް 14 ފަރާތަކުން ކުރިމަތިލާފައި ވާއިރު މީޑިއާ ކައުންސިލްގެ އާންމުންގެ މެންބަރުކަމުގެ މަގާމަށްވެސް 14 ފަރާތަކުން ކުރިމަތިލާފައި ވާ ކަމަށް ހޯމް މިނިސްޓްރީން ވަނީ ބުނެފައެވެ.
މީޑިއާ ކައުންސިލްގެ އިންތިހާބުގައި ވޯޓުލެވޭނީ ރަޖިސްޓްރީ ކޮށްފައި ވާ ނޫސްތަކަށާއި ބްރޯޑްކާސްޓަރުންގެ ތެރެއިން ކޮންމެ މީޑިއާއެއްވެސް ތަމްސީލު ކުރާ އެއް ފަރާތަކަށެވެ. މޯލްޑިވްސް މީޑިއާ ކައުންސިލް އެކުލެވިގެން ވަނީ 15 މެންބަރުންގެ މައްޗަށެވެ. އެއީ މީޑިއާގެ 8 މެންބަރުންނާއި އާންމުންގެ 7 މެންބަރުންގެ މައްޗަށެވެ.
