ހަލުވިކަމާއެކު ފެތުރެމުން އަންނަ ކޮރޯނާވައިރަސް ޑިޒީޒް (ކޮވިޑް-19) އަށް ޓެސްޓުކޮށް، އެ ބަލި ޖައްސާ ވައިރަހަށް އިއްޔެ ނެގެޓިވް ވުމަކީ، ހަމަޖެހިލާ، ރައްކާތެރިކަމުގެ ފިޔަވަޅުތަކަށް ދޫކޮށްލަންވީ ސަބަބެއް ނޫން ކަމަށް، އެމެރިކާގެ ސާޖަން ޖެނެރަލް ޑރ ޖެރޯމް އެޑަމްސް އިންޒާރު ކުރައްވައިފިއެވެ.
ސާޖަން ޖެނެރަލް އަކީ، އެމެރިކަގެ މައި ސަރުކާރުގެ ފަރާތުން، އާންމު ސިއްހީ ކަންކަމާ ގުޅިގެން ވާހަކަދައްކަވާ އިސް ތަރުޖަމާނެވެ. އެ މަގާމުގައި މިވަގުތު ހުންނެވި ވައިސް އެޑްމިރަލް ޑރ ޖެރޯމް އެޑަމްސް ދެއްވި މި އިންޒާރަކީ، ކޮވިޑް-19ގެ ބަލިމަޑުކަމާ ގުޅިގެން ގިނަ ބަޔަކަށް ކުރެވިފައި އޮންނަ ކުށްހީ އަކަށް ސަމާލުކަން އަނބުރާލެއްވި އިންޒާރެކެވެ.
އަންގާރަ ދުވަހު "ފޮކްސް އެންޑް ފްރެންޑްސް"ގައި ވާހަކަދައްކަވަމުން ޑރ އެޑަމްސް ވިދާޅުވީ، އެވަރޭޖު ގޮތެއްގައި މީހަކަށް ވައިރަހުގެ އަސަރު ކުރާތާ 5 ވަރަކަށް ދުވަހުގެ ތެރޭގައި ބަލީގެ އަލާމާތްތައް ފެންނަން ފަށާ ކަމަށެވެ. އަނެއް ބައި ފަހަރު، 14 ދުވަސްވެސް ވެދާނެ ކަން އޭނާ ވަނީ ހަނދާން ކޮށްދެއްވާފައެވެ.
ކޮވިޑް-19 އަށް ޓެސްޓު ނުކޮށް، ނަތީޖާ ނޭނގޭ މީހަކަށް ވުރެ، އެ ވައިރަހަށް ޓެސްޓުކޮށް، ނެގެޓިވް ނަތީޖާއެއް ލިބިފައި ވާ މީހަކާ އެކު އުޅެން ފަސޭހަ ވެދާނެ ކަމަށާ، ނަމަވެސް، އިއްޔެ އެ ބައްޔަށް ނެގެޓިވް ވުމަކީ، މާދަމާގެ ރައްކާތެރިކަން ކަށަވަރު ކޮށްދޭނެ ކަމެއް ނޫން ކަމަށް ޑރ އެޑަމްސް ވިދާޅުވިއެވެ.
ނެގެޓިވް ނަތީޖާއެއް ލިބުމަކީ، ރައްކާތެރި ކަމުގެ ފިޔަވަޅުތަކަށް ދޫދޭންވީ ސަބަބެއް ނޫން ކަމަށްވެސް ޑރ އެޑަމްސް އިންޒާރު ކުރެއްވިއެވެ. އެހެން ކަމުން، ރަނގަޅަށް އަތްދޮވުމާއި، މާސްކު އެޅުމާއި، ގައިދުރުކަން ތަންފީޒު ކުރުން ކުރިއަށް ގެންދިއުމަށް އެދިވަޑައިގަންނަވާ ކަމަށްވެސް އެމެރިކާގެ ސާޖަން ޖެނެރަލް ވަނީ ވިދާޅުވެފައެވެ.
ކޮވިޑް-19 ޖައްސާ ސިވިއާ އެކިއުޓް ރެސްޕިރޭޓަރީ ސިންޑްރޯމް ކޮރޯނާވައިރަސް 2 (ސާސްކޮވް-2)އަކީ ވަރަށް ފަސޭހައިން ފެތުރޭ ވައިރަހެކެވެ. އިންފެކްޓް ވެފައިވާ މީހަކު ކެއްސާ، ކިނބިހި އެޅުން ފަދަ ހަރަކާތްތަކުގެ ތެރޭގައި ހަށިގަނޑުން ބޭރުވާ ތިކިތަކުގެ ޒަރިއްޔާއިންނާއި، ވައިރަހުގެ އަސަރު ހުރި ތަނެއްގައި އަތް ލެވުމަށްފަހު މޫނު މަތީގެ ގުނަވަނެއްގައި އަތް ޖެހިގެންވެސް ހަށިގަނޑަށް ވައިރަހުގެ އަސަރު ކުރުމުގެ ފުރުސަތު ބޮޑެވެ. މި ބަލިން ދިފާއުވުމަށް ވެކްސިނެއް އަދި ކަށަވަރު ވެފައި ނުވާއިރު، ކަނޑައެޅިގެން ވަކި ފަރުވާއެއްވެސް ނޯވެއެވެ.
