ހަލުވިކަމާއެކު ފެތުރެމުން އަންނަ ކޮރޯނާވައިރަސް ޑިޒީޒް (ކޮވިޑް-19) އިން ދިފާއުވުމަށް ތަރައްގީ ކުރާ ވެކްސިން އާންމު ކޮށްދިނުމަށް ހިންގާ ގައުމީ މަޝްރޫއު، އަންނަ ޑިސެމްބަރު މަހުގެ މެދަކާ ހިސާބުގައި ފެށުމުގެ ފުރުސަތު އެބައޮތް ކަމަށް، އެމެރިކާ ސަރުކާރުގެ ކޮވިޑް-19 ވެކްސިނާ ބެހޭ އިސްވެރިޔާ ޑރ މުންސިފް ސަލޫއީ ވިދާޅުވެއްޖެއެވެ.
ކޮވިޑް-19އިން ދިފާއުވުމަށް ތަރައްގީ ކުރަމުން އަންނަ ގިނަ ވެކްސިންތަކެއްގެ ތެރެއިން ފައިޒާ އަދި ބައޮއެންޓެކް ކުންފުނީގެ ކާމިޔާބު ވެކްސިން، އާންމު ކޮށް ދޭން ފެށުމަށް އެމެރިކާގެ ފުޑް އެންޑް ޑްރަގް އޮތޯރިޓީގެ ސިއްކައަށް އެދި ހުށަހަޅާފައި ވަނިކޮށް، އެމެރިކާގެ ސަރުކާރުގެ އޮފިޝަލު މިކަން ހާމަ ކުރައްވާފައި ވަނީ، ސީއެންއެންއަށް ދެއްވި އިންޓަވިއުއެއްގައެވެ.
ހުއްދައަށް އެދި ހުށަހަޅާފައިވާ ވެކްސިންތަކާ ބެހޭ ގޮތުން އެފްޑީއޭގެ ޓީމުން މަޝްވަރާ ކުރާނީ ޑިސެމްބަރު މަހުގެ 8 އިން 10 އަށް ކަމަށް ހަބަރު ލިބެއެވެ.
ވެކްސިން މަޝްރޫއު ހަލުވި ދުވެއްޔެއްގައި ކުރިއަށް ގެންދިއުމަށް އެމެރިކާގެ ސަރުކާރުން ހިންގާ "އޮޕަރޭޝަން ވޯޕް ސްޕީޑް"ގެ އިސްވެރިޔާ ޑރ ސަލޫއީ ވިދާޅުވީ، ސަރުކާރުގެ އަމާޒަކީ، ހުއްދަ ލިބޭތާ ފުރަތަމަ 24 ގަޑިއިރުގެ ތެރޭގައި، ވެކްސިން ޑޯޒްތައް، އެކަމަށް ހާއްސަ ސައިޓްތަކަށް ފޮނުވާލުން ކަމަސެވެ. އެހެންކަމުން، އެފްޑީއޭގެ ހުއްދަ ލިބޭތާ ދެ ދުވަހެއްގެ ތެރޭގައި ވެކްސިން ދޭން ފެށޭނެ ކަމަށް އޭނާ ވިދާޅުވިއެވެ. އެއީ ޑިސެމްބަރު 11 ނުވަތަ 12 ކަން ވެސް އޭނާ ވަނީ ފާހަގަ ކުރައްވާފައެވެ.
މި ދަނޑިވަޅަކީ، އެމެރިކާގައި އަދިވެސް ކޮންޓްރޯލެއް ނެތި ކޮވިޑް-19 ފެތުރެމުންދާ ދަނޑިވަޅެކެވެ. އެގައުމުން ބަލި ޖެހުނު މީހުންގެ އަދަދު ވަނީ 12 މިލިއަނަށް ވުރެ މައްޗަށް އަރާފައެވެ.
