ޖުމްހޫރީ ދުވަހުގެ މުނާސަބަތުގައި، ރައީސް އިބްރާހީމް މުހައްމަދު ސޯލިހް، މާދަމާ ދިވެހި ގައުމާ މުހާތަބު ކުރައްވާނެ ކަމަށް ރައީސް އޮފީހުން ބުނެފިއެވެ.
ރައީސް އޮފީހުން ބުނީ ރައީސު ގައުމާ މުހާތަބު ކުރައްވާނީ، ހަބަރުފަތުރާ ވަސީލަތްތައް މެދުވެރިކުރައްވައި، މާދަމާ ހެނދުނު 10 ޖަހާއިރު ކަމަށެވެ.
ކޯވިޑް-19ގެ ހާލަތާ ގުޅިގެން މި އަހަރުގެ ޖުމްހޫރީ ދުވަހުގެ ޖަލްސާ ނުބާއްވަވާ ގޮތަށް ހަމަޖައްސަވާފައިވާ ކަމަށްވެސް ރައީސް އޮފީހުން މައުލޫމާތު ދެއެވެ.
ޖުމްހޫރީ ދުވަހުގެ މުނާސަބަތުގައި ބާއްވަވާ ޖަލްސާގައި ދެއްވުމަށް ނިންމަވާފައިވާ މަތީ ދަރަޖަ ހޯދާ ފަރާތްތަކަށް ރައީސް ދެއްވާ ހާއްސަ އިނާމު ދެއްވުން މިހާރުވަނީ ފަސްކުރައްވާފައެވެ.
އަދި މިހާރު ނިންމަވާފައިވަނީ ގައުމީ އިނާމާއި، ރައީސް ދެއްވާ ހާއްސަ އިނާމު ދެއްވުމަށް ވަކިން ހާއްސަ ޖަލްސާއެއް ބާއްވަވާގޮތަށެވެ. އެ ޖަލްސާ ބާއްވާނެ ތާރީހު، ފަހުން އިއުލާނު ކުރައްވާނެ ކަމަށް ރައީސް އޮފީހުން ބުނެއެވެ.
