ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) އިން ދިފާއުވުމަށް، ފާމަސޫޓިކަލް ކުންފުނި – އަސްޓްރާޒެނީކާއާއި އޮކްސްފޯޑް ޔުނިވާސިޓީ ގުޅިގެން ތަރައްގީ ކުރަމުން އަންނަ ވެކްސިން، ފުޅާ ދާއިރާއެއްގައި އުފެއްދުމުގެ އަމަލީ މަސައްކަތް، އޮސްޓްރޭލިއާގައި މިއަދު ފަށައިފިއެވެ.
މިހާތަނަށް ރާވާފައި އޮތް ގޮތުން، އޮކްސްފޯޑް-އަސްޓްރާޒެނީކާ އެލާޔަންސްގެ 30 މިލިއަން ޑޯޒްގެ ވެކްސިން، އޮސްޓްރޭލިއާގައި އުފައްދާނެއެވެ. އާންމު ބޭނުމަށް ވެކްސިން ތަރައްގީ ކުރުމުގެ އަމަލީ މަސައްކަތް އޮސްޓްރޭލިއާއިން ފެށި ނަމަވެސް، މި ވެކްސިންވެސް އަދި އޮތީ ކްލިނިކަލް ޓްރަޔަލް މަރުހަލާގައެވެ. ނަމަވެސް، މިއީ ކޮވިޑް-19 އިން ދިފާއުވުމަށް ތަރައްގީ ކުރަމުން ދާ ވެކްސިންތަކުގެ ސަބަބުން އެންމެ އުއްމީދީ އެއް ވެކްސިން ކަމަށް ބުނެވެއެވެ.
އޮސްޓްރޭލިއާގައި މި ވެކްސިން އުފެއްދުމުގެ މަސައްކަތް ކުރިއަށް ގެންދަނީ، އަސްޓްރާޒެނީކާއާއެކު ހަދާފައިވާ އެއްބަސްވުންތަކެއްގެ ދަށުން، އޮސްޓްރޭލިއާގެ ބައޮޓެކް ކުންފުންޏެއް ކަމަށް ވާ ސީއެސްލްއިންނެވެ. އޮސްޓްރޭލިއާއިން އަމާޒު ހިފާފައި ވަނީ 2021 ވަނަ އަހަރުގެ ފުރަތަމަ 6 މަސްދުވަހުގެ ތެރޭގައި ވެކްސިން ދޫ ކުރަން ފެށުމަށެވެ.
ބެލެވޭ ގޮތުގައި މި ވެކްސިން ފުރިހަމަ ވާނީ 2 ޑޯޒް ޖަހައިގެންނެވެ. އެހެންކަމުން އޮސްޓްރޭލިއާއިން މިހާރު އުފައްދާ ޝިޕްމަންޓަކީ 15 މިލިއަން މީހުންނަށް ހާއްސަ ވެކްސިން ޝިޕްމަންޓެއް ކަމަށް ލަފާ ކުރެވެއެވެ.
ސީއެސްއެލް އިން ވަނީ ކޮވިޑް-19ގެ އިތުރު ވެކްސިން ކެންޑިޑޭޓެއްވެސް އުފައްދާފައެވެ. އެއީ ކުއީންސްލަންޑް ޔުނިވާސިޓީ އިން ތަރައްގީ ކޮށްފައި ވާ ވެކްސިނެކެވެ. މި ވެކްސިން އޮތީ ކުލިނިކަލް ޓްރަޔަލް މަރުހަލާގެ 2ބީ/3 ގައެވެ. މި ވެކްސިން އުފެއްދުން މިވަގުތަށް މަޑުޖައްސާލާފައި ވަނީ، ފޭސް 1 ގެ ދިރާސާ ނަތީޖާތައް ލިބެންދެނެވެ.
